საქართველოს ეროვნული საფეხბურთო ნაკრების კაპიტანი ხვიჩა კვარაცხელია აბუ-დაბიში მერაბ დვალიშვილსა და საბა ლაზიშვილზე განხორციელებულ თავდასხმას გამოეხმაურა და ქართველ სპორტსმენებს მხარდაჭერა გამოუცხადა.
„მერაბ, საბა, მადლობა და თქვენს გვერდით ვართ! კიდევ ერთხელ აჩვენეთ მსოფლიოს, რას ნიშნავს იყო ქართველი, კაცი და ადამიანი, განსხვავებით იმათგან, ვინც ლაჩრულად, ზურგიდან მიპარვით და უთანასწოროდ შეეცადა თქვენს დაჩაგვრას. კაცები ასე არ იქცევიან და, რა თქმა უნდა, ეს არ გამოუვიდათ და ქართველებთან არც არასდროს გამოუვათ“, – წერს კვარაცხელია სოციალურ ქსელში.
ინციდენტი 11 ნოემბერს, აბუ-დაბის ერთ-ერთ სასტუმროში მოხდა. მერაბ დვალიშვილის განცხადებით, მას და ქართველ მოჭიდავე საბა ლაზიშვილს ინტერვიუს ჩაწერის დროს რუსი MMA-ის მებრძოლი უსმან ნურმაგომედოვი და მისი თანმხლები პირები თავს დაესხნენ.
დვალიშვილის თქმით, თავდამსხმელები მათ ზურგიდან მიუახლოვდნენ და ფიზიკურად გაუსწორდნენ. ინციდენტის ამსახველი ვიდეოკადრები მოგვიანებით სოციალურ ქსელებშიც გავრცელდა.
