"ჩვენ არასდროს გვითქვამს ასეთი რაღაც, რომ "ამერიკის შეერთებული შტატები ითხოვს ომს საქართველოსგან" - აი ასე, ამ ფორმით, შემთხვევითი არ არის ამ ფორმით რომ არ გვითქვამს, იქ, კულისებში რაღაცები ხდება და ჩვენ ამაზე ლაპარაკისგან თავს ვიკავებთ და ეს თავშეკავება შემთხვევითი არ არის", - ამის შესახებ ქართული ოცნების ლიდერმა მამუკა მდინარაძემ განაცხადა
"ჩვენ უნდა გავითავისოთ, რომ საუბარი გვაქვს მეგობრებზე და ჩვენი დიდი მეგობარი ქვეყნის წარმომადგენელზე და აი ამ კონტექსტიდან უნდა ძალიან მეგობრულად რაღაცები ვუთხრათ, ოღონდ ეს იმას არ ნიშნავს, რომ ჩვენ თუკი რაიმე გვექნება გასაკრიტიკებელი ან თუნდაც რჩევის სახით, ეს არ უნდა გავაკეთოთ. ეს კომპლექსი უნდა მოვიხსნათ, რომ ამბობს ამერიკის ელჩი და იცით რაა, ამას წმინდანი ამბობს. ჩვეულებრივი ადამიანია, ამ ქვეყანაში ჩვენი მეგობარი სტრატეგიული პარტნიორის წარმომადგენელი და აი ახლა უნდა გავაკეთო ის, რაზეც ახლა ვსაუბრობ - უნდა ვურჩიო.
ჩემი ძალიან მეგობრული რჩევაა, თავს ნუ იმართლებს. ჩვენ არასდროს გვითქვამს ასეთი რაღაც, რომ "ამერიკის შეერთებული შტატები ითხოვს ომს საქართველოსგან" - აი ასე, ამ ფორმით, შემთხვევითი არ არის ამ ფორმით რომ არ გვითქვამს, იქ, კულისებში რაღაცები ხდება და ჩვენ ამაზე ლაპარაკისგან თავს ვიკავებთ და ეს თავშეკავება შემთხვევითი არ არის. როცა ადამიანი გამოდის და [ამბობს] "არა, დედას გეფიცებით, მე არასდროს ასეთი რამე არ მითხოვია", ადამიანების მინიმუმ ნახევარი ფიქრობს, რომ რატომ ამბობ ამას. ესე იგი, რაღაცას ითხოვ და ჩემი გულწრფელი რჩევაა, მოდი ამ თემაზე ასე ლაპარაკისგან ყველამ თავი შევიკავოთ იმიტომ, რომ ნახევარი მაინც ისე ფიქრობს, როგორც არ აწყობთ არც მათ და არც ჩვენ, რომ ასე ფიქრობდეს ის ნახევარი", - განაცხადა ქართული ოცნების ლიდერმა, მამუკა მდინარაძემ ტელეკომპანია იმედის ეთერში.
ცნობისთვის, აშშ-ის ელჩმა კელი დეგნანმა პალიტრანიუსთან ინტერვიუში განაცხადა, რომ "საქართველოს ხელისუფლებამ ძალიან კარგად იცის, რომ აშშ-ის არასდროს მოუხდენია ზეწოლა, საქართველო ომში ჩათრეულიყო ან რუსეთისთვის ორმხრივი სანქციები დაეწესებინა".
