რობინ დანიგანი - საქართველოსთან ვახორციელებთ სამუშაოს უსაფრთხოების, შუა დერეფნის, ენერგეტიკული კუთხით, რაც ეხმარება საქართველოს თავისი მომავლის დასავლეთთან დაკავშირებაში

საქართველოს დასავლეთთან ინტეგრაციის მცდელობა, სამუშაო, რომელსაც საქართველოსთან ვახორციელებთ უსაფრთხოებისა და ეკონომიკური თანამშრომლობის, შუა დერეფნის, ენერგეტიკული და სატრანსპორტო ინფრასტრუქტურის კუთხით, ეხმარება საქართველოს თავისი მომავლის დასავლეთთან დაკავშირებაში, – ამის შესახებ საქართველოში აშშ-ის ელჩობის კანდიდატმა, რობინ დანიგანმა სენატის საგარეო ურთიერთობათა კომიტეტში გამართულ მოსმენაზე განაცხადა.

რობინ დანიგანს კითხვა დაუსვა სენატორმა პიტ რიკეტსმა, რისი გაკეთებაა შესაძლებელი, რათა ებრძოლონ იმასთან დაკავშირებით, რომ რუსეთი ცდილობს, საქართველო თავისი გავლენის სფეროსთან დააახლოოს.

„ეს ნამდვილად კრიტიკული კითხვაა და ღრმად მჯერა, რომ ჩვენი მხარდაჭერა საქართველოს დემოკრატიული ინსტიტუტების შენების, დამოუკიდებელი მედიის გაძლიერების, სასამართლოს დამოუკიდებლობის გაძლიერების გზაზე – ყველა ეს ნაბიჯი ეხმარება საზოგადოების გაძლიერებას და ხდის მას უფრო მედეგს რუსეთის მავნებლურ საქმიანობასთან ან ჩინეთის მავნებლურ ქმედებებთან მიმართებით.

საქართველოს დასავლეთთან ინტეგრაციის მცდელობა, სამუშაო, რომელსაც საქართველოსთან ვახორციელებთ უსაფრთხოებისა და ეკონომიკური თანამშრომლობის, შუა დერეფნის, ენერგეტიკული და სატრანსპორტო ინფრასტრუქტურის კუთხით, ეხმარება საქართველოს თავისი მომავლის დასავლეთთან დაკავშირებაში. იმ შემთხვევაში, თუ მე დამამტკიცებენ, გავაგრძელებ ამ საკითხის პრიორიტეტად დაყენებას, რადგან ეს ძალიან მნიშვნელოვანია“, – განაცხადა რობინ დანიგანმა.

პიტ რიკეტსის კიდევ ერთ კითხვაზე, უნდა დაიკავონ თუ არა ხისტი ხაზი საქართველოში ანტიდემოკრატიული ძალების წინააღმდეგ, რობინ დანიგანმა განაცხადა:

„მჯერა, რომ აუცილებელია, ვიყოთ გულწრფელი საქართველოსთან იმ შემაშფოთებელ ნაბიჯებთან დაკავშირებით, რომლებსაც ვხედავთ. დანიშვნის შემთხვევაში, გავაგრძელებ გულწრფელ ურთიერთობას მთავრობასთან. მე ვიცი, რომ ამჟამად გვაქვს მთავრობასთან ასეთი საუბარი და გავაგრძელებ მას“, – რობინ დანიგანმა.