ზურაბ აზარაშვილი - მოლაპარაკებაზე უარი არასდროს გვითქვამს, დაახლოებით ორი კვირის წინ ჩემთან შეხვედრაც იყო, სამწუხაროდ, პროცესი ისევ ქუჩაში გაგრძელდა, ულტიმატუმის ენით საუბარი გადაწყვეტილების მიღებას არ დააჩქარებს

საქართველოს ჯანდაცვის მინისტრის, ზურაბ აზარაშვილის განცხადებით, უწყებათაშორისი საბჭოს, პროტოკოლსა და გაიდლაინზე მომუშავე ჯგუფების ანალიზიდან, დასკვნებიდან გამომდინარე იქნება შესაძლებელი მსჯელობა, რა მეთოდებით, როდიდან შეეძლებათ, რომ ქვეყანაში დაინერგოს აქონდროპლაზიის სამკურნალო მედიკამენტი თუ სხვადასხვა მეთოდი.

„ჩვენ ამ ბავშვებთან მიმართებით უკვე დანერგილი გვაქვს რეაბილიტაციის პროცესი, ასევე მკურნალობის სხვადასხვა მეთოდი. მზად ვართ, დიაგნოსტიკა იქნება თუ მკურნალობა, დავუფინანსოთ როგორც საქართველოში, ისე საქართველოს ფარგლებს გარეთ. ეს არის, რისი დადასტურებაც სამუშაო ჯგუფს უკვე შეუძლია. ვინაიდან ამ მედიკამენტთან მიმართებით არსებობს გამოწვევები, კითხვები, საბჭო მსჯელობს, რათა შესაბამისი გადაწყვეტილება მიიღოს“, – განაცხადა ზურაბ აზარაშვილმა.

კითხვაზე, აღნიშნულ დაავადებაზე მომუშავე საბჭოს მსჯელობისთვის რაიმე ვადა ხომ არ აქვს მიცემული, აზარაშვილმა აღნიშნა, რომ საბჭოს ასეთ ვადას ვერ დაუწესებს.

„სამწუხაროდ, მე არ შემიძლია, ასეთი ვადები მივცე. ეს არის სრულიად დამოუკიდებელი საბჭო, სადაც ჩვენს სამინისტროს წარმომადგენლებთან ერთად, ჩართულია სხვადასხვა სამინისტროს წარმომადგენელი, ასევე არიან იუნისეფის ბავშვთა ფონდისა და სახალხო დამცველის წარმომადგენლები. ბევრი სტრუქტურაა ჩართული. ჩემგან კონკრეტული ვადის მიცემა არასწორი იქნება, რადგან მსჯელობა მიმდინარეობს სხვადასხვა მეცნიერულ დასაბუთებაზე, კვლევასა და შედეგზე“, – აღნიშნა აზარაშვილმა.

ამასთან, მთავრობის ადმინისტრაციაში გამართულ ბრიფინგზე ზურაბ აზარაშვილს კითხვით მიმართეს, რას უპასუხებდა აქციის მონაწილე მშობლებს, რომლებიც აცხადებენ, რომ დიალოგთან დაკავშირებით მათთან პირადად არავინ მისულა და კომუნიკაცია არ ჰქონია.

„ჩვენ შეთანხმებაზე, მოლაპარაკებაზე არასდროს გვითქვამს უარი. დაახლოებით ორი კვირის წინ ჩემთან შეხვედრაც იყო, მაგრამ სამწუხაროდ, პროცესი ისევ ქუჩაში გაგრძელდა, ნაცვლად იმისა, როგორიც იყო ჩვენი შეთავაზება, რომ სამუშაო ფორმატში გაგრძელებულიყო. სამწუხაროა, რომ ასე ხდება. ძალიან მნიშვნელოვანი კითხვები მოდის პარტნიორების, ყველა ჩართული ქვეყნის თუ მხარეების მხრიდან, პროტესტის ფონზე რატომ გვიწევს გადაწყვეტილებების მიღება. სამუშაო ჯგუფი თუ უწყებათაშორისო საბჭო ყველანაირი ზეწოლისა და ზემოქმედებისგან თავისუფალი უნდა იყოს, რათა პაციენტის საუკეთესო ინტერესებიდან გამომდინარე მიიღოს გადაწყვეტილება. ეს ფონი ხელს უშლის, აფერხებს გადაწყვეტილების მიღებას. ულტიმატუმის ენით საუბარი, კონკრეტული თარიღის მითითების თუ მთავრობის გადაწყვეტილების, პროცესს არანაირად არ წაადგება და არ დააჩქარებს. სჯობს, კონსტრუქციული რეჟიმი, სამუშაო მაგიდის ფორმატი და მერწმუნეთ, გადაწყვეტილება მიღებული იქნება ბავშვების საუკეთესო ინტერესებიდან გამომდინარე“, – განაცხადა ზურაბ აზარაშვილმა.