სრული პასუხისმგებლობით ვაცხადებ, რომ არც მე, არც ჩემი ოჯახის წევრებს არასდროს გვქონია კავშირი ქოლცენტრებთან, დღევანდელი განცხადებით ვაშაძე ცდილობს, შეცდომაში შეიყვანოს საზოგადოება, – ამის შესახებ საქართველოს პარლამენტის წევრმა, ისკო დასენმა „სტრატეგია აღმაშენებლის“ ლიდერის, გიორგი ვაშაძის დღევანდელი განცხადების საპასუხოდ აღნიშნა.
კერძოდ, დასენმა კომენტარი გააკეთა ვაშაძის იმ განცხადებაზე, სადაც „სტრატეგია აღმაშენებლის“ ლიდერი ე.წ. ქოლცენტრების საქმესთან კავშირში დეპუტატ ისკო დასენს და მისი ოჯახის წევრებს ადანაშაულებს.
დეპუტატ ისკო დასენის განცხადებით, გიორგი ვაშაძეს არ გააჩნია არანაირი მტკიცებულება, არ წარუდგენია და ვერც წარადგენს.
„გიორგი ვაშაძემ გააკეთა განცხადება, თითქოს მე და ჩემი ოჯახის წევრები გარეულები ვიყავით ქოლცენტრებთან დაკავშირებულ დანაშაულებთან. ამასთან, დასახელებული აქვს რამდენიმე გვარიც, მათ შორის ვინმე არახამიაც. სრული პასუხისმგებლობით მინდა, განვაცხადო, რომ არც მე, არც ჩემი ოჯახის წევრებს, შვილებს არანაირი ურთიერთობა არასდროს არ გვქონია ამ ქოლცენტრებთან და, საერთოდ, ამ დანაშაულებთან. ამის შესახებ მე ადრეც მქონდა გაკეთებული განცხადება. დასახელებული არიან ასევე ზურაბ ლეშქაშელი, მიხეილ არახამია, ქეთევან თევდორაძე და მალხაზ ამოიანი. ვაცხადებ, არცერთს ამ პიროვნებებიდან, არც მე, არც ჩემი ოჯახის წევრები არ იცნობენ. თქვენთვის ცნობილია, ყველამ ვიცით, გავრცელდა ინფორმაცია, რომ ვაშაძის ოჯახის წევრი მონაწილეობდა ამ დანაშაულის ჩადენაში. დღევანდელი განცხადებით, ვაშაძე ცდილობს, შეცდომაში შეიყვანოს საზოგადოება. საქმეზე მიმდინარეობს გამოძიება საქართველოს ფარგლებს გარეთ. დრო გვიჩვენებს ყველაფერს და დადგინდება, ვის მიერ არის ჩადენილი ეს დანაშაულებები. ვაშაძეს არ გააჩნია არანაირი მტკიცებულება, არ წარმოუდგენია და ვერც წარმოადგენს. ვისაც ჩადენილი აქვს დანაშაული, აუცილებლად უნდა აგოს პასუხი კანონის წინაშე“, – განაცხადა ისკო დასენმა.
