ენტონი ბლინკენი - ნატო-ს მომავალ სამიტზე შეიძლება მოსალოდნელი იყოს უკრაინისთვის პოლიტიკური და პრაქტიკული მხარდაჭერის სტაბილური პაკეტის შეთავაზება

აშშ-ის სახელმწიფო მდივნის, ენტონი ბლინკენის განცხადებით, ძალიან ადრეა იმის თქმა, თუ საით მიემართება უკრაინის კონტრშეტევა, მაგრამ ვაშინგტონი დარწმუნებულია, რომ კიევი გააგრძელებს წარმატების მიღწევას რუსეთის მიერ მიტაცებული მიწების დაბრუნების მცდელობაში.

მედიის ინფორმაციით, ბლინკენმა ეს განცხადება ვაშინგტონში გამართულ პრესკონფერენციაზე გააკეთა.

ენტონი ბლინკენი მიიჩნევს, რომ ვილნიუსში, ნატო-ს მომავალ სამიტზე, შესაძლოა, მოსალოდნელი იყოს უკრაინის მიმართ პოლიტიკური და პრაქტიკული მხარდაჭერის სტაბილური პაკეტის შეთავაზება.

ამასთან, მისი თქმით, აშშ-ს მტკიცედ აქვს გადაწყვეტილი მაქსიმალურად გაზარდოს თავისი მხარდაჭერა უკრაინის მიმართ, რათა ქვეყანამ ბრძოლის ველზე წარმატების მიღწევა შეძლოს.

ცნობილი ხდება, რომ აშშ-მ დღეს, შესაძლოა, უკრაინის სამხედრო დახმარების ახალი პაკეტი გამოაცხადოს. 

„ამერიკის შეერთებული შტატები უკრაინას 325 მილიონ აშშ დოლარამდე ღირებულების დამატებით სამხედრო დახმარებას გაუწევს“, - წერს „ამერიკის ხმის“ კორესპონდენტი „ტვიტერზე“.

მისი წყაროს ცნობით, დახმარების პაკეტში შედის Stryker-ის ჯავშანტექნიკა და Bradley-ს ტიპის ქვეითი საბრძოლო მანქანები. უკრაინა ასევე მიიღებს საბრძოლო მასალას NASAMS-ისა და HIMARS-ის სარაკეტო სისტემებისთვის.