ღარიბაშვილს თავისი გაჭირვება აქვს, - ასე უპასუხა მოსამართლე ნატო ხუჯაძემ პარტია „გირჩი-მეტი თავისუფლების“ ბრალდებულ წევრს, გელა ხასაიას.
სხდომაზე, სადაც მისი და დაკავებულ ვასილ ქერდიყოშვილის აღკვეთის ღონისძიების გადასინჯვაზე მსჯელობდნენ, ხასაიამ სიტყვით ისარგებლა.
მან მოსამართლესა და პროკურორს სთხოვა განემარტა, როგორ მოახდენდა ის მოწმეებზე ზემოქმედებას, მან ბრალდებული ყოფილი პრემიერ-მინისტრის, ირაკლი ღარიბაშვილის მაგალითი მოიყვანა, რომელიც გირაოს სანაცვლოდაა თავისუფალი.
„მთელი ეს პერიოდი, ვცდილობ, ამ ყველაფერში პატარ-პატარა სიმართლის დადგენას. შევეგუებოდი, თუკი სასამართლო, პროკურორი ამიხსნის, როგორ შემიძლია ზეწოლა მოწმეებზე, ვიდრე ამ ქვეყნის ყოფილ პრემიერ-მინისტრს, ირაკლი ღარიბაშვილს შეუძლია, რომელიც გირაოს სანაცვლოდ არის გარეთ",- განაცხადა ხასაიამ, მას მოსამართლემ ნატო ხუჯაძემ სიტყვა შეაწყვეტინა და უთხრა, მისი საქმის გარშემო ესაუბრა.
„ღარიბაშვილს თავისი გაჭირვება აქვს",- განაცხადა მოსამართლე ხუჯაძემ.
მისი გადაწყვეტილებით, ჯგუფურად ჩადენილი ჯანმრთელობის განზრახ ნაკლებად მძიმე დაზიანების ფაქტზე პარტია „გირჩი-მეტი თავისუფლების“ ბრალდებული წევრი, გელა ხასაია და ვასილ ქერდიყოშვილი კვლავ პატიმრობაში რჩებიან.
საქმე არსებითად განსახილველად სასამართლოს გადაეცა.
ცნობისთვის, პროკურატურა გელა ხასაიას ედავება, რომ მან 1-ელ სექტემბერს, თბილისში, თამარ მეფის გამზირის მიმდებარე ტერიტორიაზე ვასილ ქერდიყოშვილთან ერთად, ჯგუფურად ჯანმრთელობის განზრახ დაზიანება მიაყენა დაზარალებულს - რამაზ ჩადუნელს.
