უკრაინის პრეზიდენტის ვოლოდიმირ ზელენსკის განცხადებით, უკრაინას ახლა აქვს „კარტები“, რუსეთის სრულმასშტაბიანი შემოჭრის შემდეგ ამოქმედებული უკრაინული სამხედრო და საწარმოო ობიექტების წყალობით.
ირლანდიელ ბლოგერ კეილინ რობერტსონთან ინტერვიუში ზელენსკიმ კომენტარი გააკეთა იმ ფაქტზე, რომ აშშ-მა დახმარებისთვის კონკრეტულად უკრაინას მიმართა და არა საფრანგეთს ან გერმანიას და ასევე „უარი თქვა ბრიტანულ ავიამზიდზე“.
კითხვაზე, როგორ გრძნობს თავს არსებულ სიტუაციასთან დაკავშირებით, ზელენსკიმ უპასუხა: „კარგად“.
„ახლა ეს ჩვენი ჯარისკაცების, შესანიშნავი ადამიანების და იმ სხვადასხვა პროდუქციის დიდი რაოდენობის დამსახურებაა, რომლის წარმოებაც ომის დაწყებიდანვე გავზარდეთ. ახლა მაღალ დონეზე ვართ. ამერიკელებმა გვთხოვეს და, რა თქმა უნდა, ვამაყობ, რომ შეგვიძლია დავეხმაროთ ჩვენს ამერიკელ პარტნიორებს“, - აღნიშნა ზელენსკიმ.
მისი თქმით, უკრაინას აქვს „კარტები“, რომლებიც აქამდე არ გამოუჩენია.
„ვფიქრობ, ერთი წლის წინაც მქონდა, მაგრამ არ გამოგვიჩენია. ახლა კი ყველა ხვდება, რომ გვაქვს. დიახ, ეს სიმართლეა“, - აღნიშნა ზელენსკიმ.
მისი თქმით, უკრაინისთვის მშვიდობიანი დრო მხოლოდ იმ შემთხვევაშია შესაძლებელი, თუ მისი მოკავშირეები მზად იქნებიან მხარდაჭერისთვის და ასევე მნიშვნელოვანია, რამდენად მზად არიან მოკავშირეები უკრაინის მხარდასაჭერად და რამდენად სწრაფად განხორციელდება ეს მხარდაჭერა.
„ყველამ სწრაფად უნდა ვიმოქმედოთ. ეს იგივეა, რაც სირენის შემთხვევაში, როცა რაკეტები და „შაჰედები“ გიტევენ, თუ სწრაფად არ იმოქმედებ საკუთარი თავის დასაცავად, განადგურდები. იგივეა ამ ომშიც, იგივეა პუტინთან დაკავშირებით. ის უნდა შეჩერდეს. სწრაფი მოქმედებაა საჭირო“, - განაცხადა ზელენსკიმ.
ცნობისთვის, იანვარში აშშ-ის პრეზიდენტმა დონალდ ტრამპმა განაცხადა, რომ ის უკრაინის ლიდერის, ვოლოდიმირ ზელენსკის ერთადერთი „კოზირი“ იყო და რომ მის გარეშე „სრული კატასტროფა“ მოხდებოდა.
„მას არანაირი „კარტი“ არ აქვს. არანაირი „კარტი“ არ ჰქონია [რუსეთის შეჭრის] პირველივე დღიდან“, - აღნიშნა ტრამპმა.
