ადამიანები, ვისაც გულწრფელად გვინდა ევროპასთან საქართველოს მომავლის დაკავშირება, ევროპული სტანდარტების შესაბამისად მოვიქცევით, ეს კონკრეტულად რაში გამოიხატება, ამაზე მოგვიანებით ვისაუბრებთ, – ამის შესახებ პარტია „ლელო საქართველოსთვის“ წევრმა დავით უსუფაშვილმა განაცხადა.
უსუფაშვილის თქმით, ის, რომ ფრაქცია „ქართულ ოცნება“ არ აპირებს რიგგარეშე სესიაში მონაწილეობის მიღებას, „ეს უმრავლესობის პოლიტიკური გადაწყვეტილება იყო“.
„სამართლებრივად კონსტიტუცია ცალსახად მიუთითებს იმაზე, რომ რიგგარეშე სესია პრეზიდენტი იწვევს და შემდეგ ბიურო ადგენს იმ გეგმას, რომლითაც უნდა იმუშაოს, მაგრამ ამ პროცესში მონაწილეობა უმრავლესობამ მიზანშეწონილად არ ჩათვალა, რაც სწორი ნაბიჯი არ არის, ვინაიდან ჩვენ ყველა, პირველ რიგში კი, ხელისუფლება უნდა ცდილობდეს შეხების წერტილების გაჩენას და არა პირიქით. საკონსტიტუციო ცვლილებები თავისთავად, სულ რომ არ იყოს საუბარი 12 პუნქტზე, უმრავლესობა თავად უნდა ეძებდეს იმ თემებს, რომელზეც შეიძლება, გადაწყვეტილება ყველამ ერთად მივიღოთ. ამან, რომ მოხსნას წინააღმდეგობები ყველა მხრიდან, ჩვენი მოტივაცია ეს იყო. „ქართული ოცნება“ ამისთვის მზად არ არის და აპირებს, იგივე რეჟიმში გააგრძელოს პარლამენტში მუშაობა, როგორც მუშაობდა. ჩვენი გეგმები იქნება მიმართული საქართველოს, როგორც სახელმწიფოს მიერ იმ ამოცანების შესრულებისკენ, რომელიც საჭიროა ევროკავშირის წევრობის მოსაპოვებლად. ჩვენ გავაგრძელებთ მუშაობას 12 პუნქტის შესასრულებლად საჭირო ყველა შესაძლო გადაწყვეტილებაზე და შემოდგომიდან გვექნება აქტიური ფაზა ამ გადაწყვეტილებების მხარდაჭერის. ამ პროცესში ჩვენ არავის მივცემთ შესაძლებლობას, რომ ქვეყანა არასწორ გზაზე დააყენოს. ადამიანებს, ვისაც გულწრფელად გვინდა ევროპასთან საქართველოს მომავლის დაკავშირება, ევროპული სტანდარტების შესაბამისად მოვიქცევით. ეს კონკრეტულად რაში გამოიხატება, ამაზე ცოტა მოგვიანებით ვისაუბრებთ“, – განაცხადა დავით უსუფაშვილმა.
