ოდესის პორტის დაბომბვა მოწმობს, რომ დაპირების მიუხედავად, რუსეთი ყოველთვის იპოვის გზებს, შეთანხმება არ განხორციელდეს, – ამის შესახებ უკრაინის პრეზიდენტმა, ვოლოდიმირ ზელენსკიმ აშშ-ის კონგრესის დელეგაციასთან შეხვედრისას განაცხადა.
ზელენსკის თქმით, სტამბოლში გაფორმებული შეთანხმებიდან 24 საათზე ნაკლებ დროში, ოდესის პორტის ტერიტორიაზე მარცვლეულის ტერმინალები დაიბომბა.
„დღეს უკრაინის წინააღმდეგ დიდი რაოდენობით რაკეტებით დარტყმა განხორციელდა. ჩვენთვის ეს უკვე ჩვეულებრივი მოვლენაა, სამწუხაროდ. მაგრამ რატომ მინდა ამის თქმა. იმიტომ, რომ ეს დაკავშირებულია სამიზნეებთან, სადაც ეს სარაკეტო დარტყმები განხორციელდა. ისინი მიმართული იყვნენ, სხვა ტერიტორიებთან ერთად, ოდესაში. და ეს მას შემდეგ, რაც გუშინ თურქეთმა, გაერო-მ და რუსეთმა განაცხადეს, რომ მათ იციან, როგორ მოილაპარაკონ და უზრუნველყონ უსაფრთხო დერეფანი უკრაინული მარცვლეულის ექსპორტისთვის. 24 საათი არც იყო გასული, ოდესის პორტში მარცვლეულის ტერმინალები დაიბომბა. ეს მოწმობს, რომ რაც უნდა თქვას ან შეპირება გასცეს, რუსეთი ყოველთვის იპოვის გზებს, რომ შეთანხმება არ განხორციელდეს. გეოპოლიტიკურად, იარაღით, სისხლით თუ არა. მას აქვს რამდენიმე ვექტორი, როგორც ის ყოველთვის მოქმედებს. ეს აჩვენებს, რომ უკრაინა არ შეიძლება იყოს ქვეყანა, სადაც გაყინული კონფლიქტია. ჩვენ ნამდვილად გვჭირდება, რომ უკრაინამ შეძლოს შესაბამისი ნაბიჯების გადადგმა ჩვენი ტერიტორიების დეოკუპაციისთვის“, – თქვა ვოლოდიმირ ზელენსკიმ.
