საქართველოს პარლამენტის თავმჯდომარის შალვა პაპუაშვილის განცხადებით, მომავალი სახალხო დამცველი შერჩეული უნდა იყოს გამჭვირვალე, ღია პროცედურის შედეგად და მასში მონაწილეობა უნდა მიიღოს ოპოზიციამაც.
მისივე თქმით, კანდიდატი ან ომბუდსმენი ყველასთვის თანაბრად მისაღები უნდა იყოს.
„ომბუდსმენის საკითხს რაც შეეხება, იცით, რომ ჩვენ წლის ბოლოს უნდა ავირჩიოთ ომბუდსმენი. ძალიან ცხადად ვთქვით, რომ პირველ სექტემბრამდე იქნება ოპოზიციისთვის ისეთი პროცედურის შეთავაზება, რომელიც უზრუნველყოფს, რომ კანდიდატი, რომელსაც პარლამენტი შეარჩევს, თანაბრად მისაღები იქნება როგორც უმრავლესობისთვის, ისე ოპოზიციისთვის. 90 ხმა არის საჭირო. ჩვენ ცალკე ვერანაირ გადაწყვეტილებას ვერ მივიღებთ. ამიტომ, საჭიროა ოპოზიციის მონაწილეობა.
კანდიდატი თანაბრად მისაღები უნდა იყოს როგორც უმრავლესობისთვის, ისე ოპოზიციისთვის და არა ისე, რომ ოპოზიციამ ან სხვა ჯგუფებმა აიძულონ უმრავლესობა, მხარი დაუჭიროს მათ კანდიდატს. ეს დემოკრატიის ნაწილი არ არის. იქიდან გამომდინარე, რომ კვალიფიციური უმრავლესობაა საჭირო და თანხმობა, ჩვენ შევთავაზებთ პროცედურას, რომელიც უზრუნველყოფს, რომ თანაბრად მისაღები კანდიდატი იყოს ყველასთვის. პროცედურა უნდა იყოს ღია, იყოს განხილვები და რაღაცამდე უნდა მივიდეთ.
განსხვავებით ოპოზიციისგან, რომელსაც უკვე თავისი კანდიდატები შეიძლება, ჰყავს, ჩვენ ჩვენი კანდიდატები არ გვყავს. ჩვენ ვამბობთ, რომ კანდიდატი ან ომბუდსმენი უნდა იყოს თანაბრად მისაღები ჩვენთვისაც და მათთვისაც. ოპოზიციის ნაწილი ფიქრობს, რომ უნდა იყოს კანდიდატი, რომელიც იქნება მათთვის მისაღები. ჩვენ ოპოზიციას შევთავაზებთ ისეთ პროცედურას, რომელიც უზრუნველყოფს, რომ კვალიფიციური უმრავლესობით რაც საჭიროა, არჩეულ იქნას ადამიანი, რომელიც თანაბრად მისაღები იქნება ყველასთვის. შესაძლოა, 100-პროცენტიანი თანხმობა არ არსებობდეს, 150 დეპუტატი არ იყოს მომხრე, მაგრამ მნიშვნელოვანია, რომ არსებობდეს პროცედურა, რომელიც უზრუნველყოფს კანდიდატის თანაბრად მისაღებობას, მათ შორის პროცესის გამჭვირვალობას. ჩვენ პასუხს ვაგებთ ჩვენს ნაბიჯებზე“, – განაცხადა პაპუაშვილმა.
კითხვაზე, ვინ იქნება „ქართული ოცნების“ კანდიდატი, პაპუაშვილმა აღნიშნა, რომ როცა წარადგენენ, მაშინ გახდება ცნობილი. „როცა წარვადგენთ, მაშინ გახდება ცნობილი“, – აღნიშნა პაპუაშვილმა.
