თურქეთის პრეზიდენტ რეჯეფ თაიფ ერდოღანის განცხადებით, თურქეთის ხუთი ბანკი რუსული გადახდის სისტემა „მირის“ შემოღებას გეგმავს. მედიის ცნობით, ამის შესახებ თურქეთის პრეზიდენტმა სოჭში, რუსეთის პრეზიდენტთან გამართული შეხვედრიდან დაბრუნების შემდეგ განაცხადა.
ერდოღანის თქმით, რუსეთის პრეზიდენტთან ეკონომიკური ურთიერთობების გაღრმავებაზე შეთანხმდა და მათი მიზანი ქვეყნებს შორის სავაჭრო ბრუნვის 100 მილიარდ დოლარამდე გაზრდაა. ამასთან, თურქეთის პრეზიდენტის განცხადებით, ხელი მოეწერა ურთიერთგაგების მემორანდუმს ეკონომიკური და კომერციული ურთიერთობების გაღრმავების, მათ შორის რუსული რუბლით ვაჭრობის შესახებ. მისი თქმით, ეროვნულ ვალუტებში ვაჭრობა ორივე ქვეყნისთვის იქნება მომგებიანი ფინანსურად.
„ჩვენ პუტინთან შევთანხმდით რუბლზე. ასევე არის რუსეთის გადახდის სისტემა „მირი“. ამჟამად ჩვენი ხუთი ბანკი მუშაობს ამაზე. აქაც მნიშვნელოვანი წინსვლაა. ეს, რა თქმა უნდა, ძალიან კომფორტული პროცესია რუსეთიდან ჩამოსული ტურისტებისთვის. ამით ისინი შეძლებენ საყიდლებზე სიარულს და სასტუმროს ხარჯების გადახდას“, – განაცხადა ერდოღანმა.
