ეს არის უკრაინის პოლიტიკური ისტაბლიშმენტის გარკვეული წარმომადგენლების მხრიდან მორიგი შეურაცხმყოფელი განცხადება საქართველოსა და ქართველი ხალხის წინააღმდეგ გაკეთებული. ამ მხრივ სამწუხაროდ ახალი არაფერი არ არის, ეს არის ჩვეულებრივი პროვოკაციული განცხადება, – ამის შესახებ უმრავლესობის წევრმა, ირაკლი ქადაგიშვილმა მიხაილ პოდოლიაკის განცხადების კომენტირებისას აღნიშნა.
ქადაგიშვილის თქმით, პოდოლიაკის განცხადება მიზნად ისახავს ერთადერთ რამეს – საქართველოში სიტუაციის დესტაბილიზაციას შეუწყოს ხელი.
„ვფიქრობ, როდესაც თვითონ არიან გარკვეულ სასოწარკვეთაში ჩავარდნილი, ცდილობენ, რომ ეს ისრები რატომღაც საქართველოზე გადმოიტანონ. ომის დაწყების დღიდან უკრაინის თუ ადგილობრივი რადიკალური ომის მომხრე ოპოზიციის წარმომადგენლებისგან იყო დაუსრულებელი ძახილი, რომ სანქცირებული ტვირთები გადადის და რუსეთის შეიარაღებული ძალების მომარაგებას ახორციელებს საქართველო. დღიდან ამ განცხადებებისა უკვე ექვს თვეზე მეტია გასული, არანაირი მტკიცებულება არ იქნა წარმოდგენილი. რატომ? იმიტომ, რომ ბუნებაში ასეთი რამ არ ხდება. კიდევ ერთხელ ვიმეორებ, ეს არის ჩვეულებრივი პროვოკატორის პროვოკაციული განცხადება, რომელიც არის შეურაცხმყოფელი მთელი ქართველი ერისა და ხალხის. ამ ადამიანს არ აქვს შეგრძნება ეროვნული ღირსებისა და ამიტომ, ასე ადვილად აყენებს ქართველ ხალხს შეურაცხყოფას. ეს არის ძველი პროვოკატორის ძველი პროვოკაციული განცხადებების ხელახლა გამეორება, რომ რამენაირად ამ პროვოკაციული განცხადებებით საქართველოში ვითარების ესკალაციას შეეწყოს ხელი“, – განაცხადა ქადაგიშვილმა.
უკრაინის პრეზიდენტის მრჩეველმა, მიხაილ პოდოლიაკმა „ამერიკის ხმასთან“ ინტერვიუში განაცხადა, რომ საქართველომ უნდა აირჩიოს, მხარს უჭერს კაციჭამიებს თუ თავისუფლებას, აქ არ არსებობს რუხი ტონები.
