ნატო-ში საქართველოს ინტეგრაცია "ქართული ოცნების" მხრიდან გაყინულია,- ამის შესახებ "სტრატეგია აღმაშენებლის" ლიდერმა გიორგი ვაშაძემ ჟურნალისტებს განუცხადა.
როგორც ვაშაძე აღნიშნავს, ბოლო 9 წლის განმავლობაში ნატო-ში ინტეგრაციის მიმართულებით ნაბიჯები არ გადადგმულა.
"ჩათვალეთ, რომ ეს განცხადება საგანგებოა - ნატო-ში საქართველოს ინტეგრაცია "ქართული ოცნების" მხრიდან გაყინულია! არაფერი კეთდება განსაკუთრებული იმისთვის, რომ ჩვენ დავაჩქაროთ ნატო-ში ინტეგრაცია. უბრალოდ, ფორმალურად ხდება შესრულება მოჩვენებითი ვალდებულებების, ვითომ ნატოს-კენ მივდივართ. რეალურად, ნატო-ში ინტეგრაცია გაყინულია. ეს არის მიზანმიმართული პოლიტიკა, რომელიც აქვს "ქართულ ოცნებას". რატომ? - არ ვიცი. ეშინიათ რუსეთის? ეშინიათ რამე სხვის? ან უბრალოდ მიზანმიმართულად აკეთებენ? - არ ვიცი. ფაქტია, რომ ჩვენ იოტისოდენა ნაბიჯი არ გადაგვიდგამს წინ ნატო-ში ინტეგრაციის პროცესში ბოლო 9 წლის მანძილზე. ნატო-ში ინტეგრაცია გაყინულია "ქართული ოცნების" მხრიდან", - განაცხადა ვაშაძემ.
ცნობისთვის, ბრიუსელში დღეს ნატო-ს სამიტი გაიმართება, რომლის ერთ-ერთი განსახილველი თემა საქართველოც იქნება. საქართველოს საგარეო საქმეთა სამინისტროს განცხადებით, მნიშვნელოვანია, რომ საქართველოს საკითხი მოხვდა სამიტის დღის წესრიგის იმ ნაწილში, რომელიც წესებზე დაფუძნებული საერთაშორისო წესრიგის მხარდაჭერას ეხება.
