„ახალგაზრდა იურისტთა ასოციაციის“ ხელმძღვანელი ნიკა სიმონიშვილი აცხადებს, რომ მმართველი გუნდის გადაწყვეტილება, „სამართლიანი არჩევნები“ არ მიიწვიონ საარჩევნო კოდექსის რევიზიასთან დაკავშირებით შექმნილ სამუშაო ჯგუფში, არის მიუღებელი.
მისივე თქმით, მიუღებელი და დაუშვებელია, რომ ნებისმიერი პარტია, ვინც არ უნდა იყოს, ერეოდეს სამოქალაქო სექტორის საქმიანობაში უხეში ფორმით და ცდილობდეს გადაწყვეტილების მიღების პროცესში გავლენა მოახდინოს.
„პლატფორმის საბჭომ მიიღო გადაწყვეტილება, საია-ს და „სამართლიანი არჩევნების“ ამ ჯგუფში წარმოდგენასთან დაკავშირებით და მმართველი გუნდი ამ ყველაფერს უბრალოდ არ ეთანხმება. არ სურს იხილოს ამ ჯგუფში „სამართლიანი არჩევნები“, რომელსაც ძალიან დიდი გამოცდილება აქვს საარჩევნო პროცესის დაკვირვებისა. შეხვედრაზე მოვისმინეთ, რომ „სამართლიან არჩევნებს“ აქვს გაკეთებული განცხადება, რომლის გამოც, არ დაუშვებენ ამ ჯგუფში. ვიტყოდი, რომ ეს არის ცალსახად დისკრიმინაციული გადაწყვეტილება.
ისფედ-მა გამოხატა თავისი სურვილი, მონაწილეობა მიეღო აიამ პროცესში და ეს მიუთითებდა, რომ ის მზად იყო თანამშრომლობისთვის, მათ შორის როგორც სახელისუფლებო, ასევე სხვადასხვა პოლიტიკურ პარტიებთან. ვფიქრობ, ასეთი უხეში ჩარევა სამოქალქო სექტორის საქმიანობაში, ასეთი დისკრიმინაციული გადაწყვეტილება არსებითად ზიანს აყენებს იმ პროცესს, რომელშიც ჩვენ ახლა ვართ. ეს არის პირდაპირ უგულებელყოფა ევროკავშირის რეკომენდაციების. ორგანიზაციას, რომელსაც ენდობა ევროკავშირი, უნდობლობას, რომ უცხადებს მმართველი გუნდი და თიშავს პროცესებიდან, ეს არსებითად აზიანებს პროცესს“, – განაცხადა ნიკა სიმონიშვილმა.
მისივე თქმით, მან დატოვა ჯგუფის შეხვედრა, რადგან მიუღებელი იყო იქ ყოფნა.
„ჩემთვის მიუღებელი იყო იმ შეხვედრაზე ყოფნა, სადაც ჩემს კოლეგებს არ მიესალმებიან და არ უშვებენ. ვერ ვიტყვით, რომ ბოიკოტს ვაცხადებთ, უბრალოდ ვერ ვიქნებით იმ შეხვედრაზე, სადაც ჩემი კოლეგები არ იქნებიან. ვფიქრობ, აქ მნიშვნელოვანია, რომ პროცესი არ დაზიანდეს, თუმცა მეორე მხრივ, დაუშვებელია, აქ არ იყვნენ სამოქალაქო სექტორის წარმომადგენლები. აქედან გამომდინარე, მე დავტოვე შეხვედრა, მე დამატებით კონსულტაციებს ასევე გავაგრძელებ ჩვენს კოლეგებთან და ამის შემდეგ გადავდგამთ ნაბიჯებს. ჩვენი ორგანიზაციისთვის მიუღებელია, ვიყოთ იმ შეხვედრაზე და შემდგომ გავაგრძელოთ იმ შეხვედრებზე მონაწილეობა, სადაც ხელისუფლება ვინმეს არ უშვებს ან ვინმეს არ ელაპარაკება“, – განაცხადა სიმონიშვილმა.
