ახლა ოპოზიციაში რადიკალური რიტორიკა და რადიკალური დღის წესრიგი აქვს არა „ნაციონალურ მოძრაობას“, არამედ სხვა, პატარა პარტიებს. სინამდვილეში, საქმე გვაქვს იმასთან, რომ ოპოზიციაში ეს პარტიები ელოდებიან „ნაციონალური მოძრაობის“ დაშლას და მისი ამომრჩევლის მიზიდვას, – ამის შესახებ პარლამენტის ვიცე-სპიკერმა, ლევან იოსელიანმა საქართველოს პირველ არხს განუცხადა.
მისი თქმით, არც ერთ პარტიას არ აქვს რესურსი, ისეთი აქციები გამართოს, რომელიც ქვეყანაში ცვლილებებს გამოიწვევს.
„ყველას კარგად გვესმის, რომ ამ ქვეყანაში ისეთი აქციები ვერ იქნება, რომელიც რაიმეს შეცვლის, რადგან თავის დროზე, როცა საპროტესტო აქციებს „ნაციონალური მოძრაობა“ აორგანიზებდა, ეს ყველაფერი მაშინ ვერ მოხდა და ახლა ვერ შეძლებენ. ეს პატარა პარტიები ცდილობენ, „ნაციონალური მოძრაობის“ დაშლის შემთხვევაში, მათი ამომრჩევლის ხმა მიიღონ და ისეთ გზავნილებს გაახმოვანებენ, რითაც მათ გულს მოიგებენ. შეჯიბრი მიდის იმაზე, ვინ უფრო რადიკალური იქნება, რომ რადიკალური ამომრჩეველი საკუთარი პარტიისკენ მიიმხროს. არც ერთ ამ პარტიას რესურსი არ აქვს, რომ ისეთი აქციები გამართოს, რომელიც ქვეყანაში ცვლილებებს გამოიწვევს“, – განაცხადა იოსელიანმა.
