პარტია „საქართველოსთვის“ წევრის ანა ბუჩუკურის განცხადებით, საქართველოში პოლარიზაციის ძირითადი წყარო „ქართული ოცნება“ და „ნაციონალური მოძრაობაა“.
მისივე თქმით, მნიშვნელოვანია, ისეთ ეროვნულ საკითხზე, როგორიცაა ქვეყნის ევროინტეგრაცია, პოლიტიკური პარტიები ერთად დასხდნენ და სწორედ ამ გზავნილით გამოდიოდა პარტია „საქართველოსთვის“.
„საკითხი როცა ეხება პოლარიზაციას, ამ ქვეყანაში ამის ორი ძირითადი წყარო არსებობს – „ქართული ოცნება“ და „ნაციონალური მოძრაობა“. ყველა ეტაპზე ჩვენი გზავნილი იყო გაერთიანების თაობაზე. გაერთიანება იმას კი არ ნიშნავს, რომ უცებ, ყველა პარტიას ერთი და იმავე აზრი ჰქონდეს, ან ერთმანეთი შეგვიყვარდეს, მნიშვნელოვანია, ისეთ ეროვნულ საკითხზე, როგორიცაა ქვეყნის ევროინტეგრაცია, ჩვენი პოლიტიკური ინტერესები გადავდოთ და მაგიდასთან ერთად დავსხდეთ.
ჩვენი ამ პოზიციის გამო ოპოზიციის ნაწილი თავს გვესხმის ხოლმე, მაგრამ სწორედ ამ მიზნის გამო „ქართული ოცნების“ მიერ შექმნილ სამუშაო ჯგუფებში ჩავერთეთ. რაც შეეხება პასუხისმგებლობას, ბორელის განცხადებები ჩვენს მიდგომას ერთი-ერთში ემთხვევა – პირველი პასუხისმგებლობაა „ქართული ოცნების“, თუმცა პასუხისმგებლობა აქვთ ასევე იმ პარტიებს, რომლებიც რადიკალიზაციას საკუთარი გადაწყვეტილებებით ხელს უწყობენ“, – განუცხადა ანა ბუჩუკურმა საქართველოს პირველ არხს.
