ირაკლი კობახიძე - „ნაცმოძრაობა“, „ლელო“, „სტრატეგია აღმაშენებელი“, ზურაბ ჯაფარიძე, ხოშტარია ყველაფერს აკეთებენ, რომ არ შესრულდეს ევროკომისიის პირველი პუნქტი, რომელიც დეპოლარიზაციას უკავშირდება

პარტია „ქართული ოცნების“ თავმჯდომარის ირაკლი კობახიძის განცხადებით,  ზურაბ ჯაფარიძე თავის განცხადებებში აგრესიულობით და სიმძაფრით გამოირჩევა.

კობახიძემ შეაფასა გირჩი-მეტი თავისუფლებისთვის“ ლიდერის ზურაბ ჯაფარიძის მიერ ერთ-ერთი მედიის ეთერში გაკეთებულ განცხადება, სადაც ის ამბობს: „ჩემს „ტელეგრამზე“ 379 ადამიანი დარეგისტრირდა, რომლებიც მზად არიან ქუჩაში პროტესტზე, ხელის შეშლაზე, დაუმორჩილებლობაზე, საბოტაჟზე. ამოცანა მაქვს, მათი რაოდენობა გავზარდო“.

ირაკლი კობახიძის თქმით, ყველაფრის ჯანსაღი მსაჯული არის საზოგადოება და ყველაფერი მან უნდა შეაფასოს.

„ეს არ არის რაიმე ახალი. ერთადერთი ჯაფარიძე გამოირჩევა მეტი აგრესიულობით და სიმძაფრით თავის განცხადებებში. პოლარიზაციისკენ მიმართულ განცხადებებს ოპოზიციონერები აკეთებენ ფაქტობრივად ყოველდღიურ რეჟიმში. მანამდე იყო ერთ-ერთი თავმჯდომარის მაპოლარიზებელი განცხადება, საუბარი აქციებზე, რიგგარეშე არჩევნებზე და ასე შემდეგ. ახლაა ჯაფარიძე, მანამდე კიდევ სხვები. ეს არის მათი რიტორიკის ყოველდღიური შემადგენელი ნაწილი და ეს არის მათი საქმიანობის ყოველდღიური შემადგენელი ნაწილი.

მთავარია, რომ ყველამ შეაფასოს და საზოგადოებამ უნდა შეაფასოს. საზოგადოება არის ყველაზე ნეიტრალური და ჯანსაღი მსაჯული ამ ყველაფრის. საზოგადოება როდესაც ხედავს, რომ ვიღაცები ცდილობენ პოლარიზებას, ქვეყანაში ვითარების არევას, ომისკენ მიაქანებენ ქვეყანას, რა თქმა უნდა, მათ არასდროს არ ექნებათ საზოგადოების მხარდაჭერა. საზოგადოებამ უნდა შეხედოს და შეაფასოს ეს ყველაფერი“, – განაცხადა კობახიძემ.

ამასთან, როგორც კობახიძემ აღნიშნა, ქვეყანაში რამდენიმე რადიკალური ძალაა, რომელსაც არ სურს, შესრულდეს ევროკომისიის დოკუმენტის პირველი პუნქტი, რომელიც დეპოლარიზაციას ეხება.

„მათ უკავიათ რადიკალური ნიშა. ეს არის მცდელობა, რომ არავითარ შემეთხვევაში არ გამოვიდნენ რადიკალური ნიშიდან. ეს არის რეალობა. არის რამდენიმე რადიკალური პოლიტიკური ძალა, „ნაცმოძრაობა“, „ლელო“, „სტრატეგია აღმაშენებელი“ და ეს არის ზურაბ ჯაფარიძე, ელენე ხოშტარია. ეს ხუთი სუბიექტი, რომელიც არის რადიკალური ოპოზიცია, ამ ნიშაში არიან და არც უნდათ ამ ნიშიდან გამოსვლა. შესაბამისად, ისინი ყველაფერს აკეთებენ, რათა არ შესრულდეს ევროკომისიის დოკუმენტის პირველი პუნქტი, რომელიც უკავშირდება დეპოლარიზაციას“, – განაცხადა ირაკლი კობახიძემ.