„ქართული ოცნება“ თუ ელექტრონულ სისტემას შეიძენს, საარჩევნო დღის მაიმუნობები ისტორიას ჩაბარდება, – ამის შესახებ პარტია „მოქალაქეების“ წევრმა ალეკო ელისაშვილმა განაცხადა.
მისივე თქმით, ძალიან კარგი იქნება, თუ არჩევნებზე ელექტრონული ხმის მთვლელი მანქანები დაიდგმება, რადგან გამოცდილებამ აჩვენა, რომ ნახევარ საათში შედეგები ყველამ იცოდა.
„ძველი საანგარიშოებითა და დომინოს ქვებით თვლა დამთავრდა, არჩევნების შედეგებს მეორე დილამდე რომ ვერ თვლიდნენ ხოლმე. რუსთავსა და ბათუმში ჩატარებულ შუალედურ არჩევნებზე ოპოზიციას არც ერთი საჩივარი არ დაუწერია, იმდენად ეფექტურია ელექტრონული ხმის მიცემის პროცედურა. დასრულდება ის ეპოქა, როცა საანგარიშოებით ახრიგინებდნენ და ითვლიდნენ, ან ვერ ითვლიდნენ და იყო დიდი დავიდარაბა. თუ „ქართული ოცნება“ ელექტრონულ სისტემას შეიძენს, საარჩევნო დღის მაიმუნობები ისტორიას ჩაბარდება, რაც ძალიან კარგი იქნება“, – განაცხადა ალეკო ელისაშვილმა.
