უნდა მივიღოთ ის იდეა, რომ მხოლოდ უკრაინა გადაწყვეტს, როდის და რა შეიძლება იყოს მოლაპარაკების საგანი, ეს არის ჩვენი და ევროკავშირის ოფიციალური პოზიცია, – ასე უპასუხა რუმინეთის პრეზიდენტმა კლაუს იოჰანისმა პრესკონფერენციაზე ჟურნალისტის მიერ დასმულ კითხვას.
კერძოდ, რუმინეთის პრეზიდენტს კითხვა დაუსვეს რუმინეთის თავდაცვის მინისტრის განცხადებაზე: „მინისტრმა გასულ დღეებში თქვა, რომ მშვიდობის დამყარების ერთადერთი შანსი ამ ეტაპზე არის რუსეთთან მოლაპარაკება. ამასთან დაკავშირებით ზელენსკიმ აღნიშნა, რომ ისინი, ვინც ასეთ განცხადებებს აკეთებენ, რუსეთის მანიპულაციის ქვეშ არიან და არ შეიძლება, ტერორისტებთან მოლაპარაკება. რას ფიქრობთ, რუმინეთის თავდაცვის მინისტრის ამ განცხადების შესახებ, არის თუ არა რუსეთთან მოლაპარაკებები მშვიდობის დამყარების ერთადერთი შანსი, განსაკუთრებით იმის გათვალისწინებით, რაც მოხდა“.
როგორც კლაუს იოჰანისმა განაცხადა, მხოლოდ უკრაინამ უნდა გადაწყვიტოს, რა შეიძლება იყოს მოლაპარაკების საგანი.
„ამ ომში რუსეთი თავს ესხმის უკრაინას და უკრაინელები ომში ამ ფასს სისხლით იხდიან. უნდა მივიღოთ, ვაღიაროთ ის იდეა, რომ მხოლოდ უკრაინა გადაწყვეტს როგორ, როდის და რა შეიძლება, იყოს მოლაპარაკების საგანი. ეს პოზიცია, მიდგომა გახლავთ ჩვენი ოფიციალური მიდგომა, ასევე ევროკავშირის. ალბათ სჯობს, რომ უფრო ხშირად წაიკითხოს ზოგიერთმა ჩვენმა წარმომადგენელმა ასეთი პოზიციების შესახებ“, – განაცხადა რუმინეთის პრეზიდენტმა.
