საქართველოს ხელისუფლება და ჩვენი სახელმწიფო ნებისმიერ ადამიანს, ვინც ქვეყანაში შემოდის, კანონმდებლობის, საერთაშორისო კონვენციების და წესების საფუძველზე განიხილავს, რომლის ხელმომწერიც და ვალდებულიც გახლავთ საქართველო, – ამის შესახებ პარლამენტის წევრმა, არჩილ თალაკვაძემ პრეზიდენტ სალომე ზურაბიშვილის განცხადების კომენტირებისას აღნიშნა.
თალაკვაძის განცხადები, სახელისუფლებო გუნდი სავიზო რეჟიმს წარმართავს კანონმდებლობისა და საერთაშირისო წესების თანახმად.
„რაიმე ახალი გადაწყვეტილება სავიზო რეჟიმთან დაკავშირებით პარლამენტში განხილული არ ყოფილა. საქართველოს პრეზიდენტი, კონსტიტუციის მიხედვით, გახლავთ დამოუკიდებელი ინსტიტუტი. შესაბამისად, არ არის საფუძვლიანი, რომ მისი განცხადებები მაინც და მაინც შეთანხმებული უნდა იყოს მთავრობასთან და პარლამენტთან. სახელისუფლო გუნდი სავიზო რეჟიმს წარმართავს კანონმდებლობის საფუძველზე და საერთაშირისო წესების თანახმად. ცოტა ხნის წინ მოვისმინეთ ამერიკის შეერთებული შტატებისა და გერმანიის მთავრობების წარმომადგენლების განცხადებები, სადაც პირდაპირ საუბრობენ რუსეთიდან მობილიზაციის შემდეგ წამოსულ ადამიანებზე და მათ გამოხატეს თავისი სახელმწიფოების პოზიცია, რომ ასეთი ადამიანები უნდა მიიღონ და შეუშვან თავის საზღვრებში. საქართველოც არ არის გამონაკლისი. საქართველოც საერთაშორისო კონვენციების და ვალდებულების ფარგლებში განიხილავს სავიზო საკითხებს“, – განაცხადა თალაკვაძემ.
საქართველოს პრეზიდენტმა, სალომე ზურაბიშვილმა მოლდოვაში ვიზიტისას განაცხადა: „რუსეთის მოქალაქეების საქართველოში შემოსვლა ნამდვილად არის გამოწვევა, გამორიცხული არ არის, რომ საკმაოდ ლიბერალური სავიზო რეჟიმის გადახედვა მოგვიწიოს“.
