„სამუშაო ჯგუფშიც ჩანდა, რომ ყოველთვის „ლელო" ასრულებდა ჩამშლელის როლს და ეს როლი ახლაც ბოლომდე შეასრულა", - განაცხადა დღეს, 29 ივნისს, საპარლამენტო უმრავლესობის წევრმა, შალვა პაპუაშვილმა „ლელოს"გადაწყვეტილების კომენტირებისას.
შეგახსენებთ: „ლელომ" საარჩევნო კოდექსში შესატან ცვლილებებს მხარი არ დაუჭირა.
პაპუაშვილის თქმით, „ლელოს" ეს გადაწყვეტილება მიშელის შეთანხმების დარღვევას ნიშნავს და ამით „ნაციონალური მოძრაობის" პათოსს შეუერთდა.
"მათ შესახებ ასეთი დაბალი წარმოდგენა არ მაქვს, ვიფიქრო, რომ ვერ გაერკვნენ საკითხში. 40- პროცენტიანი ბარიერი არის ოპოზიციის წინადადება. ეს თავის დროზე „რესპუბლიკელებმა", „სტრატეგია აღმაშენებელმა" დააყენეს, უკვე დიდი ხანია, ამაზე მიდის მსჯელობა. ახლა ისეთი პოზის დაჭერა, რომ ეს მათთვის სიახლე იყო, სასაცილოა. როგორ ჩანს, „ლელო" "ნაციონალურ მოძრაობასთან" ერთად, ერთ სტრატეგიაზე დალაგდა. სამუშაო ჯგუფშიც ჩანდა, რომ ყოველთვის "ლელო" ასრულებდა ჩამშლელის როლს და ეს როლი ახლაც ბოლომდე შეასრულეს, "ნაციონალურ მოძრაობასთან" ერთად მხარი არ დაუჭირეს ამას. "ლელოს" როლია "ნაციონალური მოძრაობის" სატელიტობა, რომ 19 აპრილის შეთანხმების მონაწილეთა რიგებში ყოფილიყო საცეცე "ნაციონალური მოძრაობისა" და "ევროპული საქართველოსი". "ლელოს" ფრაქციას შევხედოთ - მათ საგარეო მიმართულებას ხელმძღვანელობს "ნაციონალების" ყოფილი წევრი, იურიდიულს - "ევროპული საქართველოს" ყოფილი წევრი," - განაცხადა პაპუაშვილმა.
