ევროპარლამენტის საგარეო კომიტეტის რეზოლუციაში ძალიან მკაფიოდ არის გამოხატული ის მხარდაჭერა, რომელიც ევროპას საქართველოს, ქართველი ხალხის მისწრაფებების მიმართ აქვს და ამავე დროს, ის ძალიან მწვავე კრიტიკა, მიუღებლობა იმ ქმედებებისა და პოზიციების, რომელიც საქართველოს ხელისუფლებას აქვს, - ასე აფასებს „ევროპული საქართველოს“ პოლიტსაბჭოს თავმჯდომარე, გიგი წერეთელი ევროპარლამენტის საგარეო კომიტეტის რეზოლუციას.
მისი თქმით, ამ რეზოლუციაში ძალიან მკაფიოდ კიდევ ერთხელ არის ახსნილი, თუ რას ნიშნავს დეოლიგარქიზაცია.
წერეთლის თქმით, დეოლიგარქიზაცია ნიშნავს ბიძინა ივანიშვილის გავლენების შემცირებასა და ნიველირებას ყველა მიმართულებით.
„პრეზიდენტ სააკაშვილის პატიმრობა, მისი ავადმყოფობა და ნიკა გვარამიას პატიმრობა არის ძალიან დიდი დამაბრკოლებელი ბარიერი საქართველოს ევროინტეგრაციისთვის. ამიტომ ამას თუ ეს ხელისუფლება ყურად არ მიიღებს, რა თქმა უნდა, კიდევ უფრო გამძაფრდება ეს მოწოდებები და კიდევ უფრო დაზიანდება ჩვენი ქვეყანა“, - განაცხადა გიგი წერეთელმა.
