სახელმწიფო უსაფრთხოების გამოწვევაა, როცა ხელისუფლების წარმომადგენლები რუსული დეზინფორმაციული პროპაგანდით არიან დაკავებულნი, - ასე ეხმიანება "ლელოს" დეპუტატი ანა ნაცვლიშვილი "ქართული ოცნების" დეპუტატის, ირაკლი ზარქუას განცხადებას, რომელმაც აშშ- ში ჩატარებული არჩევნები გააკრიტიკა.
ნაცვლიშვილი აცხადებს, რომ მსგავსი ტიპის ნარატივს რუსული დეზინფორმაციული მანქანა წლებია ავრცელებს.
„ეს ნარატივი ახალი არ არის. ამ ტიპის ნარატივს წლებია უკვე ავრცელებს რუსული დეზინფორმაციული მანქანა, რომელიც ვერ ამბობს, რომ რუსეთი კარგია, ამიტომ ამბობს, რომ რუსეთი კი ცუდია, მაგრამ დასავლეთიც ჩვენნაირია, ეს არის დეზინფორმაციის მთავარი ხაზი უკვე მრავალი წელი“, - განაცხადა ნაცვლიშვილმა.
ირაკლი ზარქუამ შეერთებულ შტატებში ჩატარებული კონგრესის შუალედური არჩევნები "იმედის" ეთერში გააკრიტიკა და განაცხადა, რომ გარდაცვლილი ადამიანი აირჩიეს.
"ჩვენთან ქე მაინც გარდაცვლილები ხმას აძლევდნენ და იქ საერთოდ გარდაცვლილი აურჩევიათ. შემაშფოთებელია და მე, თუ არის საშუალება, დავგმობდი ამას", - განაცხადა ზარქუამ.
