ვოლოდიმირ ზელენსკის განცხადება, რომ „მინსკი-3“ არ იქნება, ადასტურებს კიევის პოზიციას, რომ მოლაპარაკებები არ სურს, - ამის შესახებ კრემლის პრესმდივანმა, დიმიტრი პესკოვმა „რია ნოვოსტისთან“ საუბარში განაცხადა.
კითხვაზე, ადასტურებს თუ არა ზელენსკის ეს სიტყვები პოზიციას, რომ რუსეთის ფედერაციასთან მოლაპარაკების გამართვა არ სურთ, პესკოვმა უპასუხა „აბსოლუტურად ადასტურებს“.
შეგახსენებთ, უკრაინის პრეზიდენტმა, ვოლოდიმირ ზელენსკიმ “დიდი ოცეულის“ სამიტის მონაწილეებს მიმართა და განაცხადა, რომ რუსეთის სიტყვებს ვერავინ ენდობა.
„მინსკი-3“ არ იქნება, რომელსაც რუსეთი ხელმოწერისთანავე დაარღვევს. თუ არ არსებობს კონკრეტული ქმედებები მშვიდობის აღსადგენად, ეს ნიშნავს, რომ რუსეთს უბრალოდ სურს მოგატყუოთ ყველა თქვენგანი, მოატყუოს მსოფლიო და გაყინოს ომი სწორედ მაშინ, როდესაც მისი დამარცხებები განსაკუთრებით შესამჩნევი გახდა. არ დავუშვებთ, რუსეთმა გააძლიეროს თავისი ძალები და შემდეგ დაიწყოს ტერორისა და გლობალური დესტაბილიზაციის ახალი სერია. დარწმუნებული ვარ, ახლა არის დრო, როდესაც რუსეთის დესტრუქციული ომი უნდა და შეიძლება შეჩერდეს“, - აღნიშნა ზელენსკიმ.
