ამ ქვეყნის ერთადერთი ოლიგარქი არის ბიძინა ივანიშვილი, ამიტომ თქვენი პოლიტიკა, რომ ქართველ ხალხს „თვალში ნაცარი შეაყაროთ“, თავიდან ბოლომდე განწირულია, -ასე მიმართა "ნაციონალური მოძრაობის" დეპუტატმა, ანა წითლიძემ პარლამენტის პლენარულ სხდომაზე უმრავლესობის წევრებს.
მან ე.წ. ქოლ-ცენტრებზე ისაუბრა და იკითხა - თუ ქვეყანაში ასეთი რამ არსებობდა, ხელისუფლებას ეძინა?!
„საუბარი იყო ქოლცენტრებზე, ძალიან დიდი ხანია ამაზე აპელირებს უმრავლესობა. როდესაც ამბობთ, რომ ვიღაცას აქვს ქოლ-ცენტრი და ეს ყოფილა თურმე კეზერაშვილის, როგორ წარმოგიდგენიათ, ამ ქვეყანაში ქოლ-ცენტრები არსებობდეს და ხელისუფლების გარეშე ხდებოდეს ეს ყველაფერი?! ანუ ხელისუფლებას ეძინა, ამ ქვეყანაში ქოლ-ცენტრები რომ არსებობდა? თქვენ ძალიან გარკვევით გითხრეს ჩვენმა საერთაშორისო პარტნიორებმა და გარკვევით წერია რეზოლუციაში, რომ თქვენ გყავთ პოლიტიკური პატიმრები - ნიკა გვარამია და მიხეილ სააკაშვილი. როდესაც საუბრობთ იმაზე, რომ თურმე ვინმეს პასუხისმგებლობა არის, ეს ქვეყანა მიიღებს თუ არა კანდიდატის სტატუსს, მაშინ უნდა იცოდეთ, რომ თუ ეს ვერ მოხდება და ქვეყანა კანდიდატის სტატუსს ვერ მიიღებს, ეს იქნება თქვენი ისტორიული პასუხისმგებლობა. თქვენ რომ მართლა იმაზე წუხდეთ, სრულდება თუ არა 12 პუნქტი, რომ ამ ქვეყანაში დემოკრატია უნდა განვითარდეს, მაშინ არ შემოიტანდით იმ საკანონმდებლო ცვლილებებს, რომელიც დაარეგისტრირეთ და რომელიც ეხება ადგილობრივი თვითმმართველობის კოდექსში შესატან ცვლილებებს. ეს პირდაპირ მიმართულია იმისკენ, რომ ადგილობრივი თვითმმართველობა დაასამაროთ. ამას აქვს მხოლოდ ერთადერთი მიზანი, ეს არის ოპოზიციური საკრებულოების შიში. ამ ბერკეტის გამოყენებით თქვენ ცდილობთ,ოპოზიციური საკრებულოების კონტროლის დამატებითი მექანიზმები გქონდეთ“,-განაცხადა წითლიძემ.
