ხორვატიამ ბრაზილია პენალტების სერიაში დაამარცხა და ნახევარფინალში ითამაშებს [ვიდეო] #1TVSPORT

მსოფლიო ჩემპიონატის ნახევარფინალში ხორვატიის ნაკრები გავიდა. ამ გუნდმა მუნდიალის ერთ-ერთი მთავარი ფავორიტი ბრაზილია პენალტების სერიაში დაამარცხა.

ბრაზილის ნაკრები მცირე უპირატესობას ფლობდა, მაგრამ თამაში თანაბარ ბრძოლაში მიმდინარეობდა. მატჩის პირველ ნახევარში გუნდებმა ანგარიშის გახსნა ვერ მოახერხეს და შესვენებაზე ისე გავიდნენ – 0:0. მეორე ტაიმში სიტუაცია კიდევ უფრო დაიძაბა. ორმხრივი შეტევებისა და მაღალი ტემპის მიუხედავად, გოლი არ გადიოდა. მატჩის მეორე ნახევარიც, უგოლოდ დასრულდა დამატებული 4 წუთიც.

დაინიშნა დამატებითი დრო. ორივე გუნდის ფეხბურთელები ფრთხილობდნენ და თამაშის გამწვავებას ერიდებოდნენ.  იმატა უხეშობამაც, განსაკუთრებით ხორვატიის მხრიდან. პირველი დამატებული დროის მიწურულს ბრაზილიელებმა მიზანს მაინც მიაღწიეს. ბრაზილიელების მორიგი შეტევა ნეიმარმა გოლით დააგვირგვინა – 1:0.

ეს იყო ნეიმარის 77-ე გოლი ბრაზილიის ნაკრებში, ხოლო მსოფლიო ჩემპიონატებზე – მერვე. ამ მაჩვენებლით ნეიმარი ლეგენდარულ პელეს გაუთანაბრდა, როგორც ბრაზილიის ყველა დროის საუკეთესო ბომბარდირი. დამატებითი დროის მეორე პერიოდში ხორვატია შეტევაზე გადასვლას და მატჩის გადარჩენას შეეცადა. ევროპელებმა რამდენიმე ეპიზოდში სახიფათოდ შეუტიეს, ხორვატიის ერთ-ერთი იერიში კი პეტკოვიჩმა გოლად აქცია – 1:1.

120-წუთიანი მატჩი პენალტების სერიით გაგრძელდა, რომელიც მეკარე ლივაკოვიჩის წყალობით ხორვატიამ 4:2 მოიგო და ნეხევარფინალში გავიდა, სადაც არგენტინა-ნიდერლანდების მატჩში გამარჯვებულს დაუპირისპირდება.

1tv.ge