ჯანდაცვის მინისტრის მოადგილე, თამარ გაბუნია არ გამორიცხავს, რომ სახმელეთო და საჰაერო გზით ქვეყანაში შემომსვლელი ტურისტებისთვის კოვიდპანდემიიდან გამომდინარე, განსხვავებული რეჟიმი აღარ იყოს.
როგორც თამარ გაბუნიამ მთავრობის ადმინისტრაციაში უწყებათაშორისი საკოორდინაციო საბჭოს სხდომის დასრულების შემდეგ განაცხადა, შესაძლოა, ეპიდემიოლოგიური სურათის საჭიროებიდან გამომდინარე, საჰაერო გზით შემოსულ ტურისტებსაც PCR ტესტი მოსთხოვონ.
„სახმელეთო გზით შემოსული პირები ნებისმიერ შემთხვევაში ექვემდებარებიან ტესტირებას. არ აქვს მნიშვნელობა მათი ვაქცინაციის სტატუსს. ჯერჯერობით, საჰაერო გზით ჩამოსული ტურისტები, რომლებიც შედარებით დაბალი რისკის მქონე ქვეყნებიდან ჩამოდიან ქვეყანაში, შემოდიან სავალდებულო PCR ტესტირების გარეშე. თუმცა, ამასთან დაკავშირებითაც მიმდინარეობს მსჯელობა და შესაძლებელია ეპიდემიური სურათის საჭიროებიდან გამომდინარე ეს გადაწყვეტილებაც გადაიხედოს და იყოს უნივერსალური მოთხოვნა როგორც სახმელეთო, ასევე საჰაერო გზით შემოსული ტურისტებისთვის, თუმცა, ჯერჯერობით არის განსხვავებული რეჟიმი - სახმელეთო გზით შემოსულს აუცილებლად უნდა ჰქონდეს PCR ტესტი და საჰაერო გზიდან შემოვდივართ ისევ და ისევ სრული ვაქცინაციის სტატუსის ამსახველი დოკუმენტით", - განაცხადა გაბუნიამ.
