რუსეთი ომში ვერ გაიმარჯვებს, თუმცა პუტინთან ლაპარაკი მოგვიწევს, – ამის შესახებ აშშ-ის პრეზიდენტმა ჯო ბაიდენმა ვაშინგტონში, უკრაინის პრეზიდენტ ვოლოდიმირ ზელენსკისთან ერთად გამართულ პრესკონფერენციაზე განაცხადა.
მისივე თქმით, აშშ გააგრძელებს უკრაინის მხარდაჭერას, რათა მან ბრძოლის ველზე წარმატებას მიაღწიოს.
„ომი შეიძლება, დასრულებულიყო დღესვე, პუტინს საერთოდ რომ ჰქონდეს ღირსება და გაეკეთებინა სწორი რამ, უბრალოდ ეთქვა – გაიყვანეთ სამხედროები, მაგრამ ეს ახლა ნამდვილად არ მოხდება. ამიტომ, ჩვენ გავაგრძელებთ უკრაინის მხარდაჭერას, რომ მან მიაღწიოს წარმატებას ბრძოლის ველზე ჩვენი, ევროპელი მოკავშირეებისა და სხვების დახმარებით.
პუტინმა რამდენიმე დღის წინ თავადაც აღიარა, რომ უკრაინაში ომი იმაზე რთულია, ვიდრე მას ეს წარმოედგინა. მას ეგონა, რომ ნატო-ს გატეხვას შეძლებდა. მას ეგონა, რომ უკრაინელები, რომლებიც რუსულ ენაზე საუბრობენ, მას მიესალმებიან და მიიღებენ. ის შეცდა და ცდება ახლაც. და როდესაც პუტინისთვის ცხადი გახდება, რომ მას არ შეუძლია ამ ომში გამარჯვება, სწორედ ამ დროს იქნება პრეზიდენტ ზელენსკისთვის შესაძლებელი, გადაწყვიტოს, როგორ სურს ამ ომის დასრულება“, – განაცხადა ბაიდენმა.
ამასთან ერთად, ბაიდენმა თქვა, რომ საერთაშორისო პოლიტიკაში პირისპირ შეხვედრებს ვერაფერი ჩაანაცვლებს.
„მთელი პოლიტიკა – პერსონალურია, ესაა ერთად დასხდომა და ერთმანეთის თვალებში ჩახედვა. ამას ვერაფრით შეცვლი, მეგობარია ეს, თუ მეტოქე“, – განაცხადა ბაიდენმა.
ამ კონტექსტში აშშ-ის პრეზიდენტმა აღნიშნა, რომ ის ზელენსკისთან პირისპირ შეხვედრის დროს დარწმუნდა, რომ უკრაინის პრეზიდენტს სამშობლოსთვის თავის გაწირვა შეუძლია.
„ჩვენ გავაკეთებთ ყველაფერს, რომ უკრაინის პრეზიდენტმა წარმატებას მიაღწიოს“, – განაცხადა ბაიდენმა.
