მოძალადე რეჟიმმა, რომელიც ჟურნალისტებს სცემს, კლავს, ახლა იძალადა დეპუტატებზე, - ამის შესახებ „ნაციონალური მოძრაობის" წევრმა თინა ბოკუჩავამ მას შემდეგ განაცხადა, როდესაც პარლამენტის მანდატურის სამსახურმა ოპოზიციის ნაწილს სხდომათა დარბაზი დაატოვებინა.
„ჩვენი მხრიდან ტრიბუნის ბლოკირების ერთადერთი მიზანი იყო მოთხოვნა, გადადგეს მკვლელი ირაკლი ღარიბაშვილი. ძალიან კონკრეტული მოთხოვნაა, ოპოზიციის მოთხოვნა კი არ არის, არამედ მთელი საქართველოს, საზოგადოების, ჟურნალისტების, სამოქალაქო სექტორის მოთხოვნაა", - განაცხადა თინა ბოკუჩავამ.
მისვე თქმით, სხდომათა დარბაზიდან ძალადობრივი გზით გაიყვანეს.
„ძალადობრივად გამოგვათრიეს ჩვენც, რადგან ეს არის რეჟიმი, რომელიც იძალადებს ყველაზე და ყველაფერზე, რათა შეინარჩუნოს ძალაუფლება", - განაცხადა თინა ბოკუჩავამ.
