მოწმეების ნდობის ფაქტორი დაბალია, ვინაიდან, გამოიკვეთა, რომ მიუხედავად უცხოელობისა, ამერიკელობისა და რეგალიებისა, რეალურად ადამიანები დასკვნებს წერენ ისეთ მონაცემებზე დაყრდნობით, რომელიც ზედაპირულია, ან სხვისი გადმოცემით ან ადვოკატის ინფორმაციით იციან, - ამის შესახებ სპეციალური პენიტენციური დეპარტამენტის ადვოკატმა გელა ნიკოლაიშვილმა სასამართლო პროცესის დასრულების შემდეგ ჟურნალისტებს განუცხადა.
ადვოკატის თქმით, დღევანდელი სასამართლო პროცესით ნათელი გახდა, რომ მიმდინარეობს „სასჯელის მოხდისგან თავის არიდების გეგმის შესრულების“ ოპერაცია.
„მე არ ვამბობ, რომ მიხეილ სააკაშვილი არ არის დაავადებული, რაღაც დაავადებებით, რომელიც სტრესისგან და შეუგუებლობისგან არის გამოწვეული. ჩვენ ვიხილავთ იმას, რომ არის თუ არა სააკაშვილი მძიმედ დაავადებული და ეს მძიმე დაავადება არის თუ არა ისეთი, რომლის მკურნალობა საქართველოს სამედიცინო დაწესებულებაში არ შეიძლება, ამაზეა საკითხი.
მეორე მხარე პროპაგანდისტულია, სამართლებრივი და სამედიცინო კუთხით, ყოველთვის აკეთებდა აქცენტებს იმაზე, რომ ის მოწამლეს, არასათანადოდ მკურნალობენ და ამავე დროს ამბობენ, ამაზე რატომ გვპასუხობთო“,- განაცხადა ნიკოლაიშვილმა.
კითხვაზე, ხედავს თუ არა ის მიხეილ სააკაშვილის სამკურნალოდ საზღვარგარეთ გადაყვანის საფუძველს, ადვოკატი პასუხობს, რომ სააკაშვილის მკურნალობა, თუ ის დაექვემდებარება და თვითდაზიანებას არ გააგრძელებს, სავსებით შესაძლებელია საქართველოს სამედიცინო დაწესებულებაში.
„დარწმუნებული ვარ, რომ 6 თვის, 1 წლის მერეც სააკაშვილი ცოცხალიც იქნება და ჯანმრთელიც, განურჩევლად იმისა იქნება პენიტენციურ დაწესებულებაში, საქართველოს რომელიმე კლინიკაში თუ საზღვარგარეთ. მერე იტყვიან, ავად იყო, მაგრამ ჩვენ ვუმკურნალეთო. როგორც ცნობილია „დემენცია“ საერთოდ არ იკურნება, მაგრამ გამონაკლისი იქნება“, - აღნიშნა ადვოკატმა.
კითხვაზე, აქვს თუ არა იმ მოწმეების ნდობა, რომლებსაც სასამართლო სხდომაზე მოუსმინეს, ადვოკატი პასუხობს, რომ ნდობის ფაქტორი დაბალია.
„გამოიკვეთა, რომ მიუხედავად უცხოელობისა, ამერიკელობისა და რეგალიებისა, რეალურად ადამიანები დასკვნებს წერენ ისეთ მონაცემებზე დაყრდნობით, რომელიც ზედაპირულია, ან სხვისი გადმოცემით ან ადვოკატის ინფორმაციით იციან. თვითონ არ აქვთ ნანახი და როდესაც ჩაეკითხები, მეორე მხარეს არ უნდა ეს ჩაკითხვები. პასუხი გაგვცეს ის, რომ „ლაბორატორიული და კლინიკური კვლევები არ ჩაგვიტარებია, მაგრამ დიაგნოზი, მაინც დავსვითო“, - განაცხადა გელა ნიკოლაიშვილმა.
