პარლამენტში ისევ ცირკი გაიმართა, „ნაციონალურმა მოძრაობამ" დაიწყო და სიხარულით გააგრძელა „ქართულმა ოცნებამ", ეს მიუღებელია, პარლამენტი რინგი არ არის, - ამის შესახებ ოპოზიციონერმა დეპუტატმა, პარტია „მოქალაქეების" ერთ-ერთმა ლიდერმა ალეკო ელისაშვილმა საქართველოს პირველ არხს განუცხადა.
მისი თქმით, საქართველოს შინაგან საქმეთა მინისტრი ვახტანგ გომელაური პარლამენტში ისევ უნდა მივიდეს და მისი მოსმენა ნორმალურ, სამუშაო რეჟიმში უნდა წარიმართოს, რათა იმ კითხვების დასმის შესაძლებლობა ჰქონდეთ, რაც ყველას აქვს.
„5 ივლისს, რას აკეთებდა შინაგან საქმეთა სამინისტრო და წინასწარ დაანონსებული ძალადობა რატომ ვერ აღკვეთეს? გუშინ, პარლამენტში ისევ ცირკი გაიმართა - „ნაციონალურმა მოძრაობამ" დაიწყო და სიხარულით გააგრძელა „ქართულმა ოცნებამ". ეს არის მიუღებელი, პარლამენტი არ არის რინგი. მაშინ, ვთქვათ, რომ იმ გზით მივდივართ, ვინ უფრო ხმამაღლა იკივლებს და კისრით წამოვიღებთ ერთმანეთს. გუშინდელი რეჟიმი არ არის ნორმალური, რადგან მაგიდაზე შეხტომა და კივილ-წივილი, ქალი დეპუტატის იღლიაში ამოჩრა და აქეთ-იქით ტრიალი, არც პოლიტიკაა და არ ვიცი, რა არის? ჩემს თავზე გული მერეოდა, რომ მივედი და მინდოდა, კითხვები დამესვა. გაუგებარია, ოპოზიციონერი დეპუტატი ქალი მაგიდაზე რატომ შეხტა, კივის, წივის და რატომ იქცევა უცნაურად, ეს აღმაშფოთებელია ისევე, როგორც შალვა პაპუაშვილი დინჯი კაცი მეგონა და მისი ქცევა ზღვარს გადასული იყო. მანდატურივით იღლიაში კოლეგას რომ ამოიჩრი, არ ვიცი, ამას რა ჰქვია. გუშინ რაც მოხდა, ვინ იხეირა?", - განაცხადა ალეკო ელისაშვილმა.
საქართველოს პარლამენტის რიგგარეშე სესიის პლენარული სხდომა, სადაც გუშინ შინაგან საქმეთა მინისტრ ვახტანგ გომელაურისთვის უნდა მოესმინათ, ჩაიშალა.
საკანონმდებლო ორგანოში ვახტანგ გომელაურის მისვლას ხმაური და დაპირისპირება მოჰყვა. მინისტრმა სიტყვით გამოსვლა დაიწყო გარდაცვლილი ოპერატორის, ლექსო ლაშქარავას ოჯახისთვის მისამძიმრებით, რა დროსაც ოპოზიციის წარმომადგენლები ტრიბუნასთან მივიდნენ. მათ თან ჰქონდათ ლექსო ლაშქარავასა და წითლად გადახაზული პრემიერის ფოტოები. გარდა ამისა, დარბაზში ბანერები გაშალეს მედიის წარმომადგენლებმაც.
