ჯენარო გატუზოსა და "ვალენსიას" ისტორიას წარმატებული ნაკლებად ჰქვია. ერთია, გუნდს მწვრთნელისთვის ალღოს ასაღებად გარკვეული დრო დასჭირდეს, თუმცა მეორეა, როცა სეზონის ნახევარი გავიდა და შედეგის მხრივ ისინი პირიქით, რეგრესის გზას ადგანან. "ღამურების" მატჩებში იგრძნობა, რომ მათ დომინანტური, კომბინირებული თამაშით სურთ ფონს გასვლა, თუმცა ამისათვის საკმარისი რესურსი არ გააჩნიათ. ჯენარო გატუზო საკუთარ პასუხისმგებლობას არ გაურბის, თუმცა ეს დიდი ნუგეში ვერ იქნება. თანამედროვე ფეხბურთში შედეგს დიდ მნიშვნელობას ანიჭებენ და ხელმძღვანელობას მოთმინების ფიალა იოლად ევსება.
გასულ სეზონში ხოსე ბორდალასს ჩემპიონატში არადამაკმაყოფილებელი შედეგები ჰქონდა, თუმცა
მის კომპენსირებას სამეფო თასზე ახერხებდა, სადაც ფინალში დამარცხდა. გიორგი მამარდაშვილმა და მისმა თანაგუნდელებმა ახლაც მთავარი შანსი "კოპა დელ რეიზე" უნდა ეძიონ, სადაც მეოთხედფინალში არიან და ბილბაოს "ატლეტიკთან" მოუწევს საქმის დაჭერა. წინ დიდი დროა, მიუხედავად იმისა, რომ ვალენსიელებს ჩემპიონატში გამარჯვება უჭირთ და გასავარდნ ზონას სულ რაღაც 3 ქულით აღემატებიან, შანსები გადაწურული არაა. გუნდი გამართული ფეხბურთის თამაშს ცდილობს. შესაძლოა, ედინსონ კავანის მსგავსი გამოცდილი ფიგურა მეტი უნდა შეეძინათ. მნიშვნელოვანია, რომ ჯასტინ კლუივერტმა უკანასკნელ ორ შეხვედრაში გაიტანა და მისი ფორმაში შესვლა გარდამტეხ დროს ხდება.
