ვიდრე სამართლიანი მართლმსაჯულება არ იქნება, მანამდე ეკონომიკა წინ ვერ წავა, სამუშაო ადგილები ვერ შეიქმნება, ინვესტიციები არ შემოვა, რადგან არავინ ენდობა „კლანს" და „კლანურ მმართველობას", - ამის შესახებ „სტრატეგია აღმაშენებლის" ლიდერმა გიორგი ვაშაძემ განაცხადა.
მისივე თქმით, ამერიკელი პარტნიორები მხარს უჭერენ რეფორმების გატარებას.
„ამ ქვეყანაში კორუფცია მანამდე იქნება, ვიდრე მართლმსაჯულებას კორუმპირებული კლანი აკონტროლებს. ამერიკის სახელმწიფო დეპარტამენტის განცხადება არის ნეგატიური, რადგან ინვესტიციების მიმართულებით კლანური მმართველობა პრობლემას ქმნიდა, სამწუხაროდ, „ქართულ ოცნებას" თავისი ფულის კეთების მეტი არაფერი აინტერესებს", - განუცხადა გიორგი ვაშაძემ საქართველოს პირველ არხს.
აშშ-ის სახელმწიფო დეპარტამენტმა 2021 წლის საინვესტიციო კლიმატის შესახებ ანგარიში გამოაქვეყნა, სადაც საქართველოზეც არის საუბარი. სახელმწიფო დეპარტამენტის ანგარიშში ნათქვამია, რომ საერთო ჯამში, საქართველოში ბიზნესისა და ინვესტიციის პირობები დადებითია, თუმცა არსებობს ნდობის მზარდი დანაკლისი სასამართლო სექტორის შესაძლებლობის მიმართ.
