აღმოსავლეთ უკრაინაში ქალაქ ბახმუტის დაკავება რუსეთის ძალებს საშუალებას მისცემს, განახორციელონ შემდგომი შეტევითი ოპერაციები, – ამის შესახებ რუსეთის თავდაცვის მინისტრმა, სერგეი შოიგუმ განაცხადა.
რუსეთის თავდაცვის უწყების ხელმძღვანელის თქმით, ბახმუტი მნიშვნელოვანი კერაა დონბასში, უკრაინის ჯარების დასაცავად და მისი აღება რუსეთს უკრაინის თავდაცვითი ხაზების სიღრმეში შემდგომი შეტევითი მოქმედებების განხორციელების საშუალებას მისცემს.
„დასავლეთის ქვეყნები აძლიერებენ უკრაინისთვის შეიარაღებისა და სამხედრო ტექნიკის მიწოდებას. ისინი აფართოებენ უკრაინის არმიის პერსონალის მომზადების პროგრამებს. თუმცა, ნატო-ს მხრიდან კიევის რეჟიმის მხარდაჭერა არ ნიშნავს უკრაინის წარმატებას ბრძოლის ველზე. პირიქით, ჩვენ ვამჩნევთ უკრაინის შეიარაღებული ძალების დანაკარგების ზრდას“, – აღნიშნა სერგეი შოიგუმ.
