კანონპროექტმა თავისი მნიშვნელოვანი საქმე გააკეთა სხვადასხვა თვალსაზრისით, მათ შორის ყველამ აღიარა, რომ აგენტობა არის სათაკილო საქმე, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.
მისივე თქმით, ამისთვის კანონპროექტის ინიციატორებს მადლობას უხდის.
„კანონპროექტმა თავისი მნიშვნელოვანი საქმე გააკეთა სხვადასხვა თვალსაზრისით. პირველი – ყველამ აღიარა, რომ აგენტობა არის სათაკილო საქმე, ვისი აგენტიც უნდა იყო. ეს არის პირველი მიღწევა, რაც აქვს ამ კანონპროექტს;
მეორე, ასევე ყველამ გაიგო, რომ ორგანიზაციები, რომლებიც სხვადასხვა არასახელმწიფოებრივ საქმიანობაში არიან ჩართული, როგორებიც არის, მაგალითად, მთავრობის გადადგომის მოთხოვნა სცენიდან, რაც არ არის არასამთავრობო ორგანიზაციების საქმე, ასევე გაუყალბებელი არჩევნების გაყალბებულად გამოცხადება, PVT-ის (პარალელური ხმის დათვლა) გაყალბება, ეკლესიის გინება, ლგბტ-პროპაგანდა, პროვოკაციების მოწყობა ე.წ. სამხრეთ ოსეთის ე.წ. საზღვართან, სინამდვილეში, არა ქართველი ხალხის აგენტები, არამედ უცხოური გავლენის აგენტები არიან. ეს არის მეორე ინფორმაცია, რომელიც ამ კანონპროექტმა ძალიან ცხადად და მკაფიოდ გაუზიარა ქართულ საზოგადოებას;
მესამე მნიშვნელოვანი გზავნილი, რაც აქვს ამ კანონპროექტს არის ის, რომ ვერასოდეს განხორციელდება ბაკურიანის გეგმა, ანუ „ენჯეოების“ ხელით საქართველოში „ნაცმოძრაობას“ ხელისუფლებაში ვერავინ დააბრუნებს. ეს არის სამი მნიშვნელოვანი გზავნილი, რაც ამ კანონპროექტმა მოიტანა. ამისათვის მადლობას ვუხდი „ხალხის ძალის“ გუნდს, რომელმაც დააინიცირა ეს კანონპროექტი, ასევე, თითოეულ დეპუტატს, რომელმაც კანონპროექტს პირველი მოსმენის დროს მხარი დაუჭირა. ჩვენ მივიღეთ პრინციპული გადაწყვეტილება, ბევრ რამეს გავუწიეთ ანგარიში და დღეს ეს გადაწყვეტილება იქნა გაფორმებული პარლამენტში. შესაბამისად, ვიმოქმედებთ ჩვენი პასუხისმგებლობის მიხედვით“, – განაცხადა ირაკლი კობახიძემ.
პარლამენტმა კანონპროექტი „უცხოური გავლენის გამჭვირვალობის შესახებ“ მეორე მოსმენით ჩააგდო.
