პარლამენტის ადამიანის უფლებათა დაცვის კომიტეტის თავმჯდომარის, მიხეილ სარჯველაძის განცხადებით, თვითმმართველობის არჩევნების გადადებაზე ოპოზიციის პოზიცია არა მხოლოდ არათანმიმდევრულია, არამედ საზოგადოების მხრიდან სულ უფრო ნაკლებ ნდობასა და ინტერესს იმსახურებს.
როგორც ჟურნალისტებს სარჯველაძემ განუცხადა, საზოგადოება სამწუხარო პროცესს ადევნებს თვალს, როცა ოპოზიციისთვის არგუმენტს მნიშვნელობა არ აქვს, არამედ მნიშვნელოვანია ის, რაც მათთვის გარკვეულ დროს ხელსაყრელია.
„რა თქმა უნდა, ეს ცუდი დამოკიდებულებაა. ვფიქრობ, არჩევნების გადადების თაობაზე ოპოზიციის პოზიცია არა მხოლოდ არათანმიმდევრულია, არამედ საზოგადოების მხრიდან სულ უფრო ნაკლებ ნდობას, ინტერესს იმსახურებს. ვინაიდან, არჩევნების თარიღის გადადების ერთადერთი ხერხია საგანგებო მდგომარეობის გამოცხადებაა, ეს არ არის ის საფუძველი, რაც რელევანტური იქნებოდა კონკრეტულ ვითარებაში. მძიმე პანდემიური მდგომარეობის მიუხედავად, თუ ოპოზიცია მცირე პასუხისმგებლობას გამოიჩენს, შესაძლებელია, წინასაარჩევნო კამპანია და არჩევნები ჩატარდეს ისე, რომ ამან უარყოფითი გავლენა არ იქონიოს პანდემიაზე. შესაბამისად, საარჩევნო პროცესებში მონაწილეობას მეტი პააუხისმგებლობით უნდა მოვეკიდოთ", - განაცხადა სარჯველაძემ.
