პირველი სექტემბრიდან ძალაში შედის ის პროგრამა, რომელიც შეეხება იპოთეკური სესხების პროცენტის სუბსიდირებას ოჯახებისთვის, ვისაც ეყოლება ახალშობილი, ან იმ ოჯახებისთვის, ვისაც სამი ან მეტი შვილი ჰყავს, - ამის შესახებ ეკონომიკის მინისტრმა, ნათია თურნავამ განაცხადა.
მინისტრის თქმით, აღნიშნული პროგრამა ოჯახებს პირობების გაუმჯობესების საშუალებას მისცემს.
„პირველი სექტემბრის შემდეგ ასეთ ოჯახებს, ვისაც აქვს სურვილი, რომ გაიუმჯობესოს საცხოვრებელი პირობები, ან შეიძინოს საცხოვრებელი ბინა, შეუძლიათ, მიაკითხონ ბანკებს და ისარგებლონ ჩვენი პროცენტის სუბსიდირების პროგრამით, რაც რა თქმა უნდა, ძალიან კარგი გადაწყვეტილებაა. ეს საშუალებას მოგვცემს, რომ ჩვენი მოსახლეობის კეთილდღეობა გაიზარდოს და გაუმჯობესდეს ყოფითი პირობები", - განაცხადა თურნავამ.
ცნობისთვის, საქართველოს მთავრობის ინიციატივით, 2021 წლის პირველი სექტემბრიდან სუბსიდირებული იპოთეკური სესხის სახელმწიფო პროგრამა ამოქმედდება, რომლის მიზანია ისეთი ოჯახების საცხოვრებელი პირობების გაუმჯობესება, რომლებსაც ჰყავთ ახალშეძენილი შვილი ან შვილები.
პროგრამა ითვალისწინებს ასეთი ოჯახების ან მარტოხელა მშობლების/ქვრივის მიერ აღებულ იპოთეკურ კრედიტებზე დარიცხული საპროცენტო სარგებლის სუბსიდირებას სესხის გაცემიდან 60 თვის განმავლობაში.
ეკონომიკისა და მდგრადი განვითარების სამინისტროს ინფორმაციით, პროგრამით სარგებლობის შესაძლებლობა აქვს: ოჯახს/მარტოხელა მშობელს/ქვრივს, თუ სესხის აღების მომენტში ჰყავს 2021 წლის პირველი სექტემბრის შემდეგ დაბადებული ერთ წლამდე ასაკის შვილი; ოჯახს/მარტოხელა მშობელს/ქვრივს, თუ სესხის აღების მომენტში ჰყავს სამი ან მეტი არასრულწლოვანი შვილი; ოჯახს/მარტოხელა მშობელს/ქვრივს, რომელსაც სესხის აღების მომენტში ჰყავს 2021 წლის პირველი სექტემბრის შემდეგ შვილად აყვანილი არასრულწლოვანი პირი.
ეკონომიკის სამინისტროში აღნიშნავენ, რომ პროგრამის ფარგლებში იპოთეკური კრედიტების გაცემა მოხდება მხოლოდ ეროვნულ ვალუტაში, მას გასცემს კომერციული ბანკი, პირველადი და მეორადი ბინის/სახლის შესაძენად ან კერძო სახლის ასაშენებლად.
