ინტერნეტში გაჟონილი პენტაგონის საიდუმლო მასალები გაუთვალისწინებელ გარემოებებში რუსეთ-უკრაინის კონფლიქტის განვითარების ოთხ ვარიანტს შეიცავს, – ამის შესახებ ინფორმაციას „ნიუ იორკ თაიმსი“ ავრცელებს.
გამოცემის თანახმად, გაუთვალისწინებელი გარემოებები მოიცავს ჰიპოთეტურ სცენარებს, როგორებიცაა უკრაინის მიერ კრემლის დაბომბვა, რუსეთის პრეზიდენტის, ვლადიმერ პუტინის, უკრაინის პრეზიდენტის, ვოლოდიმირ ზელენსკის სიკვდილი და რუსეთის შეიარაღებულ ძალებში ხელმძღვანელობის მოხსნა.
„სცენარის დოკუმენტი საკმაოდ ტიპური პროდუქტია, რომელიც შექმნილია სადაზვერვო სააგენტოების მიერ. ის შექმნილია იმისთვის, რომ დაეხმაროს სამხედრო ოფიცრებს, პოლიტიკოსებს ან კანონმდებლებს, იფიქრონ დიდი მოვლენების შესაძლო შედეგებზე, როდესაც ისინი აფასებენ თავიანთ ვარიანტებს“, – წერს ამერიკული გამოცემა.
გამოცემის თანახმად, დოკუმენტებში ოთხი ჰიპოთეტური სცენარიდან ერთ-ერთია, რა შეიძლება მოხდეს, თუ უკრაინა კრემლს დაარტყამს. იდენტიფიცირებულია პოტენციური შედეგების ფართო სპექტრი. როგორც გამოცემა წერს, ამ მოვლენას შეიძლება ესკალაცია მოჰყვეს, პუტინი უპასუხებს საზოგადოების პროტესტს სრულმასშტაბიანი სამხედრო მობილიზაციის წამოწყებით და ტაქტიკური ბირთვული იარაღის გამოყენების განხილვით ან, შესაძლოა, საზოგადოების შიშმა აიძულოს იგი, მოლაპარაკებაზე წავიდეს ომის დასრულების მიზნით.
„ბაიდენის ადმინისტრაცია განსაკუთრებით შეშფოთებულია უკრაინის მიერ მოსკოვზე შესაძლო დარტყმის გამო, რადგან, შესაძლოა, ამან გამოიწვიოს რუსეთის მხრიდან დრამატული ესკალაცია. უკრაინის მხრიდან ასეთი თავდასხმის საფრთხე არის ერთ-ერთი მიზეზი, რის გამოც აშშ-ს არ სურს კიევისთვის უფრო შორი რადიუსის რაკეტების მიწოდება“, – წერს „ნიუ იორკ თაიმსი“.
