საქართველოს პრემიერ-მინისტრი ირაკლი ღარიბაშვილი ორბელიანის მოედანზე ევროპის დღეებისადმი მიძღვნილ ღონისძიებას დაესწრო და შეკრებილ საზოგადოებას სიტყვით მიმართა.
ორბელიანის მოედანი დღეს შვედურ დღეს მასპინძლობს.
„პირველ რიგში, მინდა, ყველას დიდი მადლობა გადაგიხადოთ მობრძანებისთვის. მინდა, მივესალმო ჩვენს მეგობრებს, ევროკავშირის ელჩს, პაველ ჰერჩინსკის, შვედეთის ელჩს მინდა მივესალმო განსაკუთრებით, და ჩვენს მერს, ბატონ კახას. მოგეხსენებათ, ჩვენ ეს დღეები ევროპის დღეებს აღვნიშნავთ. გუშინ ელჩებთან ერთად აღვნიშნეთ ევროპის დღეების ოფიციალურად გახსნა. ასევე, იცით, რომ გუშინ აღვნიშნეთ ესპანური დღე, ვინაიდან ესპანეთი ივლისიდან ოფიციალურად გადაიბარებს ევროკავშირის თავმჯდომარეობას. მანამდე, როგორც იცით, შვედეთი არის ევროკავშირის თავმჯდომარე ქვეყანა. ამიტომ დღეს უკვე შვედეთის დღე შემოგთავაზეთ. მინდა, კიდევ ერთხელ დიდი მადლობა გადავუხადო ყველას, ჩვენს სტუმრებს ესპანეთიდან, გუშინ ჩამობრძანდნენ, სასიამოვნო, საინტერესო საღამო შესთავაზეს მოსახლეობას, მაყურებლებს, ჩვენს ხალხს. დღეს ასევე გველის შვედური საღამო, თავისი კულტურული ელემენტებით. კიდევ ერთხელ მადლობა და გისურვებთ სასიამოვნო საღამოს გატარებას“, – განაცხადა ირაკლი ღარიბაშვილმა ორბელიანის მოედანზე.
შვედურ დღესთან დაკავშირებით მოეწყო შვედი შეფის, გუსტავ ლეონჰარდის მასტერკლასი, ასევე, შვედი ავტორების წიგნების გამოფენა-გაყიდვა. შვედური დღე შვედური ჯგუფის „რილტონ ვანერისა“ და მომღერალ სოფია კარლსონის კონცერტებით დასრულდა.
