სერბეთში, ბოლო პერიოდში განხორციელებული თავდასხმების შემდეგ, ბელგრადის ცენტრში ძალადობის წინააღმდეგ მასშტაბური საპროტესტო აქცია გაიმართა.
როგორც მედია წერს, აქციის მონაწილეები შინაგან საქმეთა მინისტრის და სახელმწიფო უსაფრთხოების სამსახურის დირექტორის გადადგომას, უსაფრთხოების ზომების გამკაცრებას და მედიაში ძალადობრივი კონტენტის აკრძალვა მოითხოვენ.
ბოლო პერიოდში, ქვეყანაში ორი მასშტაბური თავდასხმა მოხდა, რასაც 17 ადამიანი, მათ შორის, ბავშვები ემსხვერპლნენ. დაშავდა 21 ადამიანი. პირველი შემთხვევა, 3 მაისს, ბელგრადის სკოლაში მოხდა, სადაც 13 წლის მოზარდმა მოსწავლეებს გაუხსნა ცეცხლი. მომდევნო დღეს კი, 20 წლის მამაკაცმა ქუჩაში გამვლელებს ესროლა.
აქციაზე მოქალაქეებმა სპეციალური საპარლამენტო სესიის დანიშვნაც მოითხოვეს, სადაც ამ თავდასხმებზე მთავრობის რეაგირების საკითხი განიხილება.
