ბათუმის საქალაქო სასამართლომ რესტორან „რეტროს“ მფლობელს აღკვეთის ღონისძიების სახით 5 000-ლარიანი გირაო შეუფარდა.
თეიმურაზ ვარშანიძე საპატიმროს გირაოს გადახდისთანავე დატოვებს, თუმცა მას საქმის განხილვის დასრულებამდე აეკრძალა დაზარალებულებთან კომუნიკაცია. ბრალდებული თავს დამნაშავედ არ მიიჩნევს.
„მინდა, ბოდიში მოვუხადო საზოგადოებას, ამბავს ძალიან განვიცდი, არავისზე ხელი არ დამირტყამს, არავის ხელით არ შევხებივარ. ჩემს ხელში გაზრდილ ბავშვებს გვერდში ვედექი, როგორც ჩემს შვილებს. როცა შევამჩნიე, რომ უკმაყოფილო იყვნენ, გამიკვირდა, ვთხოვე, გასულიყვნენ გარეთ. აღელვების ნიადაგზე შევეცადე, გარეთ გამეყვანა. პირველად აღმოვჩნდი ასეთ სიტუაციაში. თავს დამნაშავედ არ ვგრძნობ, ბოდიშს მოვუხდი საზოგადოებას“, – განაცხადა სასამართლო პროცესზე თეიმურაზ ვარშანიძემ.
თეიმურაზ ვარშამიძე ძალადობის ბრალდებით გუშინ დააკავეს. დაკავება სოციალურ ქსელში გავრცელებული ვიდეოს საფუძველზე მოხდა, რომელშიც ჩანს რესტორნის მფლობელის მხრიდან თანამშრომლის მიმართ ფიზიკური ძალადობა.
რესტორანში შრომითი ინსპექციაც შევიდა. რესტორანი 30 000 ლარით დააჯარიმეს და დახურეს. ამჟამად მისი მუშაობა შეჩერებულია. მომხდარი ფაქტის შემდეგ „რეტრო“ 15-მა თანამშრომელმა დატოვა.
