ალექსეი რეზნიკოვმა უკრაინის თავდაცვის მინისტრის თანამდებობიდან გადადგომის შესახებ განცხადება უკრაინის რადას წარუდგინა. უკრაინულის მედიის ცნობით, ამის შესახებ რეზნიკოვმა სოციალური ქსელის, „ტვიტერის“ გვერდზე დაწერა.
„უკრაინის პრეზიდენტის, ვოლოდიმირ ზელენსკის გადაწყვეტილების შესაბამისად, გადადგომის შესახებ განცხადება უკრაინის უმაღლეს რადას გადავეცი“, – დაწერა რეზნიკოვმა.
როგორც რეზნიკოვი აღნიშნავს, რუსეთის მიერ ოკუპირებული უკრაინის ტერიტორიების 50 პროცენტზე მეტი სრულმასშტაბიანი ომის 550 დღის განმავლობაში გათავისუფლდა.
რეზნიკოვის თქმით, თავდაცვის მინისტრის რანგში 22 თვის განმავლობაში დაასრულა ის ძირითადი ამოცანები, რომლებიც მას დაეკისრა. მიღწევებს შორის მინისტრმა დაასახელა პარტნიორებისგან იარაღის მიღება და ნატო-სთან დაახლოება, „რეფორმების განხორციელება შესყიდვების სფეროში“ და „ავტომატური მართვისა და კონტროლის სისტემების“ დანერგვა.
მიმდინარე კვირაში თავდაცვის მინისტრის თანამდებობაზე, რეზნიკოვის ნაცვლად, რუსტემ უმეროვის დანიშვნა იგეგმება, რომელიც ახლა სახელმწიფო ქონების ფონდს ხელმძღვანელობს.
