საქართველოს საფეხბურთო ნაკრებმა ევრო 2024-ის საკვალიფიკაციო ეტაპზე ესპანეთის ეროვნულ გუნდს თბილისში უმასპინძლა და 1:7 დამარცხდა. ეს „ჯვაროსნებს“ ისტორიაში ყველაზე დიდი ანგარიშით წაგება იყო.
ესპანელები A ჯგუფში 3 ქულით მეოთხე ადგილზე იყვნენ, ხოლო საქართველოს ეროვნული გუნდი 4 ქულით მეორე პოზიციაზე და ორივე გუნდს ქულები ჰაერივით სჭირდებოდა. თუმცა, ფავორიტად სტუმრები მიიც და გუნდმა სტატუსი საწყისი წუთებიდან გაამართლა – ესპანელებმა ტერიტორიული უპირატესობა მოიპოვეს და ბურთს აკონტროლებდნენ, საქართველოს ნაკრები კი რეალურად, ლამის მთელი შემადგენლობით დაცვაში იჯდა და ბურთის ცენტრამდე ატანაც უჭირდა.
სტუმრების შეტევებმა შედეგი გამოიღო – მარკო ასენსიოს გადაცემით ალვარო მორატამ თავური დარტყმით ანგარიში გახსნა. ექვს წუთში კი ფაბიან რუისის დარტყმის შემდეგ საბა კვირკველიამ ბურთი საკუთარ კარში ჩაჭრა. 31-ე წუთზე ესპანელებმა მესამეც გაიტანეს, მაგრამ ვიდეორეფერიმ არ ჩათვალა. ორ წუთში გიორგი მამარდაშვილმა აშკარა გოლისგან გვიხსნა, მაგრამ დანი ოლმომ მესამე მაინც გაიტანა. მალე კი ესპანელებმა კვირკველიას შეცდომით ისარგებლეს – ფაბიან რუისმა ბურთი აართვა და მეკარესთან პირისპირ დარჩენილმა მორატამ დუბლი შეასრულა.
ჩაგდებული პირველი ნახევრის შემდეგ, ვილი სანიოლმა დაგვიანებით, მაგრამ მაინც შეცვალა შემადგენლობა და შეტევების გასაძლიერებლად მოედანზე გიორგი ჩაკვეტაძე, ზურიკო დავითაშვილი და ანრი მექვაბიშვილი შემოიყვანა, ამან შედეგი მალე გამოიღო – გუნდმა აქტიურად შეუტია და ჩაკვეტაძემ ახლო მანძილიდან ანგარიშის გათანაბრება მოახერხა.
თუმცა, ესპანელებმა საქართველოს ნაკრების შეტევები მალევე ჩააცხრეს – სწრაფად გათამაშებული შეტევის შემდეგ მორატამ ჰეთ-თრიქი შეასრულა, თავი ნიკო უილიამსმაც გამოიჩინა, ხოლო ლამინე იამალი სადებიუტო გოლის ავტორი გახდა.
ოთხი ტურის შემდეგ საქართველოს ნაკრები ოთხი ქულით დარჩა, ხოლო ესპანეთმა ექვსი ქულით გადაგვასწრო. ვილი სანიოლის გუნდი ევრო 2024-ის საკვალიფიკაციო ეტაპზე შემდეგ შეხვედრას 12 სექტემბერს ნორვეგიის წინააღმდეგ ოსლოში გამართავს.
