საქართველოს ეროვნულმა საფეხბურთო ნაკრებმა ევრო 2024-ის შესარჩევ ჯგუფში კვიპროსის ნაკრებს უმასპინძლა და 4:0 დაამარცხა.
საქართველოს ნაკრების მთავარმა მწვრთნელმა, ვილი სანიოლმა, „მიხეილ მესხი არენაზე“ გამართულ შეხვედრაში სასტარტო შემადგენლობაში არ დააყენა გიორგი მიქაუტაძე, რომელმაც წინა მატჩში, ტაილანდთან, პოკერი შეასრულა. მარჯვენა ფლანგზე ლადო მამუჩაშვილი თამაშობდა, ხოლო გიორგი ჩაკვეტაძე კვლავ სასტარტო შემადგენლობაში იყო.
ტაილანდთან დიდი ანგარიშით მოგების მიუხედავად, 24-ათასიანი „მიხეილ მესხი“ ბოლომდე ვერ შეივსო. „ჯვაროსნებმა“ თამაში დამაჯერებლად ვერ დაიწყეს და პირველი სახიფათო მომენტიც საქართველოს კართან შეიქმნა – მე-6 წუთზე ხარალამპოს კირიაკუს დარტყმის შემდეგ გიორგი მამარდაშვილმა გადაგვარჩინა.
საქართველოს ნაკრები ამის შემდეგ გააქტიურდა და მომენტებიც შექმნა. გიორგი ქოჩორაშვილის ახლოდან დარტყმული მეკარემ აიღო, ორ წუთში ირაკლი აზაროვმა სახიფათო პოზიციიდან კარს ააცილა. 23-ე წუთზე ისევ ჩაკვეტაძემ შეუტია და კვლავ უშედეგოდ. გატანის შანსი ხვიჩა კვარაცხელიასაც ჰქონდა, მაგრამ არაზუსტად დაარტყა.
საქართველოს ნაკრები სწრაფი თამაში და მეტოქის საჯარიმომდე ბურთის სწრაფად მიტანა უჭირდა, კვიპროსელები ქართველებს შეტევისთვის თავისუფალ სივრცეებს არ უტოვებდნენ.
37-ე წუთზე კვიპროსელებმა კონტრშეტევა განახორციელეს და დიმიტრიოს კრისტოფმა სახიფათოდ დაარტყა – ამ ეპიზოდშიც მამარდაშვილმა გადაგვარჩინა.
მეორე ტაიმში საქართველოს ნაკრებმა თამაში უფრო მწვავედ და აგრესიულად დაიწყო, შედეგსაც მალე მიაღწია. 46-ე წუთზე, კვარაცხელიას დარტყმული მცველმა მოიგერია, იქვე მყოფმა ოთარ კიტეიშვილმა შესანიშნავი დარტყმით ბურთი მცველებში გააძვრინა და საქართველოს ნაკრები დააწინაურა – 1:0.
58-ე წუთზე კი გიორგი ჩაკვეტაძემ ერთი პასით კარის წინ კვარაცხელია მეკარესთან პირისპირ დატოვა და „ნაპოლის“ ქართველმა ლიდერმა სხვაობა ორამდე გაზარდა 2:0. 82-ე წუთზე კი ზურიკო დავითაშვილის წამოწყებული და კვარაცხელიას განვითარებული იერიში ძლიერი დარტყმით ლევან შენგელიამ დააგვირგვინა – 3:0.
