„უკნიდან მიეპარნენ და მოიტაცეს. დიდი ხნის განმავლობაში არც იცოდნენ ახლობლებმა, სად ჰყავდათ ეს ადამიანები მოთავსებული," - განაცხადა დღეს, 11 ნოემბერს, ოპოზიციის გუშინდელ აქციებზე დაკავებულების ადვოკატმა ლიკა ტურაშვილმა. მისივე თქმით, დაკავებული პოლიტიკოსებისა და სამოქალაქო აქტივისტების ნაწილი რეგიონების წინასწარი დაკავების იზოლატორებში გადაიყვანეს.
შეგახსენებთ: გუშინ, 10 ნოემბერს, ოპოზიციამ თბილისში, სამ სხვადასხვა ლოკაციაზე საპროტესტო აქცია გამართა, რა დროსაც პოლიციამ, ჯამში, 46 ადამიანი დააკავა. დაკავებულებს პოლიციის მოთხოვნისადმი დაუმორჩილებლობას და ხულიგნობას ედავებიან.
„არანაირი წინააღმდეგობის გაწევას ადგილი არ ჰქონია. ზოგიერთ მათგანს უბრალოდ უკნიდან მიეპარნენ და მოიტაცეს. დიდი ხნის განმავლობაში არც იცოდნენ ახლობლებმა, სად ჰყავდათ ეს ადამიანები მოთავსებული. ხელისუფლება გვეუბნება, რომ ხმის ამოღებისთვის, პოზიციის დაფიქსირებისთვის გვსჯიან", - თქვა ადვოკატმა ლიკა ტურაშვილმა.
რაც შეეხება სხვა დაკავებულებს, გვიან ღამით ხაშურის იზოლატორში გადაიყვანეს ზვიად კუპრავა, გოგა ონიანი და ბონდო თევდორაძე. გარდა ამისა, საგარეჯოს იზოლატორში არიან მოთავსებული დავით ნებიერიძე, ბადრი შუბლაძე და მურმან დუმბაძე. ნებიერიძემ პროტესტის ნიშნად შიმშილობა დაიწყო.
ცნობისთვის, გუშინ ოპოზიციამ საპროტესტო აქციები ერთდროულად სახელმწიფო უსაფრთხოების სამსახურთან, ჯანდაცვისა და იუსტიციის სამინისტროებთან გამართა. აქციებზე პოლიციამ ჯამში 46 ადამიანი დააკავა.
