„მითხრა, რომ სააკაშვილი უკრაინის მოქალაქეა და ქვეყანამ ის უნდა დაიბრუნოს," - განაცხადა მომღერალმა ვახტანგ (ბუბა) კიკაბიძემ, უკრაინის პრეზიდენტ ვოლოდიმერ ზელენსკის შეხვედრის შემდეგ.
ცნობისთვის: კიკაბიძე კიევში ზელენსკი სანახავად სპეციალურად ჩაფრინდა, მათი საუბრის მთავარი თემა კი საქართველოს მესამე პრეზიდენტის, მიხეილ სააკაშვილის დაკავება და მისი მდგომარეობა იყო.
„მან (ზელენსკი) მითხრა, რომ სააკაშვილი უკრაინის მოქალაქეა და ქვეყანამ ის უნდა დაიბრუნოს. მე კი ვუთხარი, რომ თუ უყვარს ბრძოლა წესების გარეშე, ჩამოვიდეს საქართველოში და ყველა იმ ადგილს ვანახებ, სადაც ურტყამდნენ და სცემდნენ იმ ადამიანებს, ვისი არჩევანიც ევროპაა, ვინც აზროვნებს ხელისუფლებისგან განსხვავებულად. თვალის გარეშე დატოვეს რამდენიმე ადამიანი. 21 ივნისს პოლიციელები მოქალაქეებს, ხელისუფლების ბრძანებით, პირდაპირ სახეში ესროდნენ, ისევე, როგორც ივლისში ჟურნალისტებს სცემს.
დიდხანს ვილაპარაკეთ. მე მას ვუთხარი, რომ ახლა სპეციალურად ჩამოვფრინდი, რათა გთხოვოთ, როგორმე დაეხმაროთ თქვენს მოქალაქეს, რადგან მაქვს განცდა, რომ ხელისუფლებას არ სურს ის ციხიდან ცოცხალი გამოვიდეს. მან მე მომისმინა და მითხრა, რომ სააკაშვილთან დაკავშირებით დღეს სატელეფონო საუბრები ექნება", - განაცხადა კიკაბიძემ
შეგახსენებთ:
საქართველოს მესამე პრეზიდენტი, მიხეილ სააკაშვილი 1-ელ ოქტომბერს დააკავეს და 43 დღეა, შიმშილობს.
11 ნოემბერს, სტრასბურგის სასამართლოს მოწოდების შემდეგ, მან მზაობა გამოთქვა პროტესტის უკიდურესი ფორმა შეწყვიტოს, ოღონდ გარკვეული დათქმებით.
