„მსჯავრდადებულ მ. სააკაშვილის წარმოდგენა სასამართლო სხდომის დარბაზში მისი უსაფრთხოების საკითხებიდან გამომდინარე, გარკვეულ რისკებთან არის დაკავშირებული," - ნათქვამია დღეს, 15 ნოემბერს, პენიტენციური სამსახურის მიერ გავრცელებულ განცხადებაში.
შეგახსენებთ: დღეს, ე.წ. პიჯაკების საქმეზე საქართველოს მესამე პრეზიდენტის სასამართლო იმართება.
„სახელმწიფო უსაფრთხოების სამსახურის წარმოებაშია სს საქმე, დანაშაული, გათვალისწინებული სსკ-ის 315 მუხლის პირველი ნაწილით, სახელმწიფო უსაფრთხოების სამსახურის მიერ საჯაროდ გავრცელებული განცხადებით კი ცნობილი გახდა, რომ იგეგმებოდა მ. სააკაშვილის პენიტენციურ დაწესებულებაში ეტაპირებისათვის ხელის შეშლის მიზნით, დაწესებულებასთან მისასვლელი საავტომობილო გზების ბლოკირება, რიგი პოლიტიკური პარტიების წარმომადგენელთა საკუთრებაში არსებული ავტომანქანების საშუალებით. მათ განზრახული ჰქონდათ აღნიშნული დესტრუქციული ხასიათის მოქმედებების განხორციელება, რომელშიც მონაწილეობას მიიღებდა დაახლოებით 500-600 ავტომანქანა, რაც გამოიწვევდა უკონტროლო სიტუაციას, ქაოსსა და შექმნილი ვითარება ხელს შეუშლიდა მიხეილ სააკაშვილის ეტაპირების პროცესს.
აღნიშნული სახის ქმედებებს შესაძლოა ადგილი ჰქონდეს მისი სასამართლო დარბაზში ესკორტირების შემთხვევაშიც.
აღსანიშნავია, რომ სპეციალური პენიტენციური სამსახურის მიერ სახელმწიფო უსაფრთხოების სამსახურიდან გამოთხოვილი ინფორმაციის თანახმად და უწყებიდან მიღებული ინფორმაციიდან გამომდინარე მსჯავრდადებულ მ. სააკაშვილის წარმოდგენა სასამართლო სხდომის დარბაზში მისი უსაფრთხოების საკითხებიდან გამომდინარე, გარკვეულ რისკებთან არის დაკავშირებული.
ამ ეტაპზე მსჯავრდადებულ მ. სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება წარმოადგენს დამატებით რისკს მისი ჯანმრთელობისთვის.
შესაბამისი გადაწყვეტილების მიღების შემთხვევაში, სპეციალური პენიტენციური სამსახური უზრუნველყოფს ბრალდებულ/მსჯავრდადებულ მ. სააკაშვილის დისტანციურ მონაწილეობას სასამართლო სხდომაში, ასევე შესაძლებელია სასამართლო სხდომის N18 ბრალდებულთა და მსჯავრდადებულთა სამკურნალო დაწესებულებაში გამართვა", - ნათქვამი პენიტენციური სამსახურის მიერ გაკეთებულ განცხადებაში.
ცნობისთვის: მიხეილ სააკაშვილი 1-ელ ოქტომბერს დააკავეს და უკვე 46 დღეა, შიმშილობს. მესამე პრეზიდენტი არ დასწრებია არც წინა სასამართლო პროცესს და ამის მიზეზად პენიტენციურმა სამსახურმა მისი ჯანმრთელობის მდგომარეობა დაასახელა.
ასევე, პენიტენციურმა სამსახურმა რამდენიმე დღის წინ გაავრცელა ვიდეო, სადაც მიხეილ სააკაშვილის გლდანის ციხეში ძალადობრივად გადაყვანის კადრებია ასახული. მას შემდეგ ექსპრეზიდენტის მდგომარეობა მძიმეა.
