„ვიმედოვნებ, რომ საერთაშორისო თანამეგობრობის მხრიდან ყურადღების გამახვილება მიხეილ სააკაშვილის უფლებების დარღვევაზე უზრუნველყოფს მისი სიცოცხლის უფლებას," - აცხადებს უკრაინის სახალხო დამცველი, ლუდმილა დენისოვა, რომელიც ისევ საქართველოშია და შეხვედრებს განაგრძობს.
შეგახსენებთ: მიხეილ სააკაშვილი 1-ელ ოქტომბერს დააკავეს და 48-ე დღეა, შიმშილობს. რამდენიმე დღის წინ, სააკაშვილი რუსთავის 12-ე დაწესებულებიდან გლდანის ციხეში გადაიყვანეს, სადაც მისი ჯანმრთელობა გაუარესდა. მიხეილ სააკაშვილის სამოქალაქო კლინიკაში გადაყვანის მოთხოვნით, ოპოზიცია პერმანენტულ აქციებს მართავს. ამასთან, იგივე მოთხოვნით, ათი დეპუტატი შიმშილობს. ასევე, ორ კვირაზე მეტია, შიმშილობს „დროას" ლიდერი ელენე ხოშტარიაც.
"უკრაინის მოქალაქის, მიხეილ სააკაშვილის უფლებების დარღვევების შესახებ ინფორმაცია მივაწოდე ადამიანის უფლებების დაცვის საკითხში გაეროს უმაღლეს კომისარს, ეუთო/ოდირის ხელმძღვანელს, ევროპის საბჭოს ადამიანის უფლებათა კომისარს, გაეროს წამების საწინააღმდეგო კომიტეტს, ასევე ადამიანის უფლებათა დამცველ 9 საერთაშორისო ორგანიზაციასა და უკრაინაში აკრედიტებულ 78 დიპლომატიურ მისიას.
ვიმედოვნებ, რომ საერთაშორისო თანამეგობრობის მხრიდან ყურადღების გამახვილება მიხეილ სააკაშვილის უფლებების დარღვევაზე უზრუნველყოფს მისი სიცოცხლის უფლებას, უსაფრთხოებას, შესაბამის სამედიცინო დახმარებას და სამართლიანი სასამართლოს უფლებას", - ამბობს დენისოვა.
