„თუკი საჭიროება გაჩნდება, ყოფილ პრეზიდენტს, მიხეილ სააკაშვილს კლინიკაში გადაიყვანენ,"- განაცხადა დღეს, 18 ნოემბერს კულტურის, სპორტისა და ახალგაზრდობის მინისტრმა, ვიცე-პრემიერმა, თეა წულუკიანმა.
შეგახსენებთ: საქართველოს მესამე პრეზიდენტი, მიხეილ სააკაშვილი 1-ელ ოქტომბერს დააკავეს და უკვე 49 დღეა, შიმშილობს. სახალხო დამცველის ექსპერტთა დასკვნით, მესამე პრეზიდენტის ჯანმრთელობის მდგომარეობა კრიტიკულია. მიხეილ სააკაშვილის სამოქალაქო კლინიკაში გადაყვანისა და გათავისუფლების მოთხოვნით ოპოზიცია პერმანენტულ აქციებს მართავს. ამავე მოთხოვნით შიმშილობს „დროას" ლიდერი ელენე ხოშტარია და ენმ-ს 10 დეპუტატი. ამგვარ პროტესტს უერთდებიან ექიმები და მოქალაქეებიც.
„შეგიძლიათ იყოთ მშვიდად იმიტომ, რომ როგორც კი და თუ გაჩნდება სამოქალაქო კლინიკაში გადაყვანის საფუძველი, რა თქმა უნდა, როგორც ამას ყოველთვის აკეთებდა პენიტენციური სამსახური, ეს ამ შემთხვევაშიც გაკეთდება. შიმშილობა აზიანებს ჯანმრთელობას, ამიტომ, ეს არ არის პროტესტის ის ფორმა, რომელსაც მე მივესალმებოდი. იმედი მაქვს, რომ ეს ადამიანები მალე შეწყვეტენ პროტესტის ამ ფორმას", - განაცხადა თეა წულუკიანმა.
